Në një 365 ditësh në Shqipëri, thuajse festohet në gjysmën e tij. Pushimi shqiptar nuk përngjan me asnjë vend tjetër europian, amerikan, aziatik apo afrikan.
Festa e fëmijëve, punëtorëve, grave, rinisë, demokracisë etj., etj… lista e festave hahet “dhëmb për dhëmb” me të shtunat dhe të dielat që i ka caktuar pushim gjithë bota, përveç Kinës!
Vit pas viti, kalendari mbushet me Ditën e Verës, Nevruzin, Pashkët katolike dhe ortodokse, Bajramin e Madh, Kurban Bajramin, Ditën e Alfabetit, Ditën e Rinisë, Ditën e Flamurit, Ditën e Çlirimit, Krishtlindjet, Vitin e Ri… dhe mes tyre futen edhe “ditë pushimi” pa emër, të shpallura me VKM, që shndërrojnë javën e punës në një mozaik pushimesh.
Shembulli më i fundit erdhi me vendimin e Këshillit të Ministrave për të shpallur të premten, 26 dhjetor 2025, ditë pushimi për administratën shtetërore, duke e zhvendosur këtë ditë pune në një tjetër ditë pushimi brenda tremujorit të parë të vitit 2026. Me pak fjalë: nuk humbet asgjë, përveç punës.
Zyrtarisht, Shqipëria ka rreth 22–24 ditë pushimi zyrtar në vit, por praktikisht, me fundjava të bashkuara, festa që bien të premte ose të hënë dhe VKM-të “shpëtuese”, numri real i ditëve jo-pune rritet ndjeshëm. Në fund, ditët efektive të punës për administratën shtetërore mbeten dukshëm më pak se në shumicën e vendeve europiane.
Pse ndodh kjo? Sepse pushimi është gjithmonë vendimi më i lehtë për t’u marrë. Nuk kërkon reforma, nuk kërkon debat dhe nuk prodhon pakënaqësi. Përkundrazi, prodhon simpati. Një VKM për pushim është më e shpejtë se çdo strategji pёr harresё tё thagmave tё ditёve tё fundit.
Dhe kush e di… ndoshta pushimet e shpeshta shërbejnë edhe për të shmangur punën e vështirë, mbledhjet e bezdisshme apo diskutimet që më mirë të shtyhen “për më vonë”. Siç i thoshin dikur: për në kalendat greke.
Në fund të fundit, në Shqipëri puna mund të presë. Pushimi, jo. As Qeveria, qё u mblodh sot pёr ta miratuar atё, me VKM!
