Kryeredaktorja e Argumentum.al, Marjana Doda, është vlerësuar me Çertifikatën e Mirënjohjes “Ilinden” për vitin 2026, në kuadër të 17-vjetorit të Shoqatës maqedonase “Ilinden”-Tiranë. Vlerësimi iu dha për kontributin profesional në informimin korrekt dhe pasqyrimin e çështjeve që lidhen me minoritetet, të drejtat e njeriut dhe të vërtetën publike.
Sipas shoqatës, çmimi dhe certifikatat e mirënjohjes u ndanë për individë dhe institucione që kanë treguar angazhim të vazhdueshëm në aktivitete kulturore, mediatike dhe shoqërore në mbështetje të komunitetit maqedonas në Shqipëri, me fokus ruajtjen e identitetit dhe të drejtave të Pakicës Kombëtare Maqedonase. Përveç Dodës, certifikata iu akordua edhe përfaqësuesve të tjerë nga fusha fetare, mediatike dhe akademike, ndërsa Çmimi “Ilinden” për këtë vit iu dha Grupit Punues për Minoritetet Sllave (AGSM) pranë Unionit Federal të Kombësive Europiane (FUEN), me seli në Gjermani.
Në një mesazh falënderues, Marjana Doda shprehu mirënjohjen për vlerësimin, duke e cilësuar si një motivim për të vijuar angazhimin profesional në shërbim të informimit të paanshëm dhe të vërtetës.
Argumentum.al është profilizuar si një media me fokus te zhvillimet politiko-diplomatike dhe gjeopolitike, me rubrika që ndjekin Shqipërinë, Kosovën, Maqedoninë e Veriut dhe Malin e Zi, si edhe me një revistë periodike në format PDF. Në qasje, portali synon raportim të kujdesshëm, të balancuar dhe analitik për tema me interes publik, veçanërisht në hapësirën rajonale dhe ndërkombëtare.
Në një realitet ku gazetaria shqiptare shpesh vihet nën presionin e klikimeve, interesave dhe pozicionimeve, ky vlerësim bie në sy për një arsye të thjeshtë: nderon pikërisht ato parime që publiku i kërkon më shumë medias — neutralitetin, objektivitetin, pavarësinë dhe profesionalizmin.
