Një lëvizje me shumë pikëpyetje ardhja në Vlorë (Shqipëri) e Ivanka Trump, vajzës së Presidentit amerikan, i cili sot është njeriu absolutisht më i fuqishëm i botës. Dhe Trump ka treguar se si një “vlonjat” i vërtetë e ka pikë të dobët Ivankën.
Ardhja sot paradite e Ivanka Trump në Vlorë është një vizitë që po shoqërohet me masa të forta sigurie dhe protokoll të pazakontë. Ajo u akomodua në një prej hoteleve luksoze të Vlorës dhe vizitoi përgjatë drekës Zvërneci dhe Akërnin.
Vlonjatët vunë re se bija e Presidentit Trump ruhej me fanatizëm brenda një strategjie sigurie të rrallë e të padëgjuar: pas çdo ndalese asaj i ndërrohej mjeti me të cilin udhëtonte. Roje civile të panumërt rrethuan pothuajse gjithë qytetin bregdetar.
Kryeministri Edi Rama raportohet se e takoi mbrëmjen e sotme Ivanka Trump. Ata biseduan për 40 minuta në një prej restoranteve në Vlorë, ku të pranishëm ishin edhe arkitektë dhe bashkëpunëtorë biznesi të Ivankës. Më pas kanë udhëtuar bashkë me të në të njëjtën makinë drejt Orikumit.
Interes apo strategji?
Qeveria shqiptare i ka dhënë kompanisë së Kushnerit statusin e “investitorit strategjik” për zhvillimin e një resorti luksoz turistik në ishullin e Sazanit. Por sot pjesë e programit të Ivanka Trump ishte dhe vizita në Zvërnec dhe Akërni, zona me potencial të lartë për investime turistike, që prej vitesh nuk preken nga investitorët shqiptarë.
Ivanka Trump erdhi në Vlorë me një skuadër të madhe arkitektësh ndërkombëtarë, fakt që tregon për një seriozitet dhe synim të qartë investimi.
Natyrisht që kryeministri Rama nuk mund ta humbte këtë “fat” që i ra nga qielli – në Vlorë. Sa do që bisedimet me Ivanka Trump do të përqendrohen rreth fushës së biznesit, takimi i tyre informal dhe jashtë kamerave nuk përjashton biseda të tjera që mund t’i shkojnë në vesh Presidentit amerikan.
A është vizita e Ivankës thjesht çështje biznesi apo ka edhe ndonjë synim që vjen si porosi e babait të saj? Kjo mbetet për t’u parë dhe komentuar nesër e në vazhdim. Fakt është që Edi Rama po sheh e po flet nga afër me bijën e atij që ka në dorë fatin e tij, por dhe të një populli të vogël, që jeton në tokën me emrin Shqipëri.
