Autoritetet braziliane po hetojnë vrasjen e Joao Ferreira da Silva, 46 vjeç, i dënuar më herët për përdhunimin dhe vrasjen e një fëmije, i cili u qëllua për vdekje në qytetin e Sinopit vetëm disa orë pasi u lirua nga burgu. Ngjarja ka nxitur reagime të forta dhe diskutime mbi sigurinë publike dhe mënyrën e lirimit të personave me precedentë të rëndë penalë.
Ferreira da Silva kishte vuajtur një dënim 20-vjeçar për vrasjen e nëntëvjeçarit Bruno Aparecido dos Santos, një krim që tronditi Brazilin në vitin 2005. Lirimi i tij u bë pas një urdhri gjykate, çka ka ngritur pikëpyetje mbi procedurat ligjore dhe vlerësimin e rrezikut që ai mund të përbënte pas daljes nga burgu.
Sipas Policisë së Sinopit, dy persona të armatosur dhe të maskuar dyshohet se kanë kryer vrasjen, ndërsa hetuesit po përqendrohen në identifikimin e autorëve dhe nëse ngjarja lidhet drejtpërdrejt me krimin pёr tё cilin vuajti dёnimin. Njësia e Policisë për Vrasje dhe Mbrojtje Personale ka konfirmuar se po analizohen pamjet e kamerave të sigurisë dhe rrethanat e krimit.
Rasti ka sjellë reagime të forta edhe nga familjarët e viktimës. Nëna e Brunos, Josiana Aparecida da Silva, deklaroi se ndjeu një përzierje dhimbjeje dhe lehtësimi pas lajmit për vdekjen e Ferreira da Silva. “Djali im nuk mund të kthehet më, por jam e lehtësuar që ai nuk do t’i bëjë keq asnjë fëmije tjetër,” u shpreh ajo.
Ferreira da Silva ishte arrestuar fillimisht në vitin 2005 dhe u ndalua dhjetë ditë pas zhdukjes së Brunos, ndërsa sipas autoriteteve, ai u kap pasi tentoi të sulmonte një tjetër fëmijë. Rasti i tij konsiderohej një nga më të rëndët në rajon, ndёrsa lirimi i tij kishte kaluar pa vëmendje publike deri në momentin e vrasjes.
Ngjarja ka rikthyer debatin në Brazil mbi politikat e lirimit me kusht, mbikëqyrjen e ish-të dënuarve për krime të rënda dhe rrezikun e vetëgjyqësisë. Autoritetet kanë theksuar se drejtësia nuk mund të zëvendësohet nga dhuna dhe se hetimi do të zbardhë plotësisht motivet dhe përgjegjësit e kësaj vrasjeje.
(Burimi: Daily Mail)
