Një nga personazhet më të dashur të letërsisë për fëmijë, Winnie the Pooh, feston këtë vit 100-vjetorin e krijimit, dhe kompania Disney ka njoftuar një seri aktivitetesh dhe eventesh që do të zgjasin gjatë gjithë vitit për të nderuar arushin e famshëm nga “Pylli me Njëqind Akra”.
Personazhi i njohur u shfaq për herë të parë në vitin 1926, në librin e shkruar nga autori britanik A.A. Milne dhe i ilustruar nga E.H. Shepard. Që nga ajo kohë, Pooh – arushi që e përshkruan veten si një krijesë me “shumë pak tru” – ka magjepsur breza të tërë lexuesish me mençurinë e tij të thjeshtë dhe aventurat plot humor.
Sot, të drejtat e personazhit zotërohen nga Disney, e cila i bleu ato në vitet 1960 dhe e ktheu Pooh në një nga figurat më ikonike të kulturës popullore. Me rastin e njëqindvjetorit, kompania ka planifikuar një festë globale që do të përfshijë ekspozita, aktivitete kulturore dhe produkte të reja të frymëzuara nga personazhi.
“Winnie the Pooh është pak nga të gjithë ne,” tha Kevin Kern, menaxher i kërkimeve në Arkivin e Walt Disney në Kaliforni, ku ruhen qindra objekte të lidhura me historinë e këtij personazhi. Sipas tij, Pooh reflekton emocionet dhe përvojat njerëzore në një mënyrë të thjeshtë dhe të përjetshme. “Ai përballet me të njëjtat sfida si ne – qoftë duke u përpjekur të ngjitet në një pemë për të marrë mjaltë, apo duke kuptuar miqtë e tij.”
Libri i parë i Milne u frymëzua nga djali i autorit, Christopher Robin, dhe koleksioni i tij i lodrave prej pellushi, ku përfshiheshin Pooh, Piglet, Eeyore, Owl, Rabbit, Kanga dhe Roo. Dy vite më vonë, në librin e dytë “The House at Pooh Corner”, grupit iu bashkua edhe personazhi energjik Tigger.
Në vitin 1966, Disney publikoi filmin e parë të animuar me Pooh, duke vendosur edhe pamjen e tij karakteristike – bluzën e kuqe të shkurtër që është bërë simbol i personazhit.
Gjatë dekadave, Pooh është shfaqur në dhjetëra libra të përkthyer në shumë gjuhë, filma të animuar dhe artistikë, si dhe në një numër të madh lodrash, çantash, orësh dhe produkteve të tjera. Një nga filmat më të fundit ishte “Christopher Robin” (2018), ku aktori Ewan McGregor luante një Christopher Robin të rritur që ribashkohet me mikun e tij të fëmijërisë.
Megjithatë, arushi i dashur nuk ka qëndruar gjithmonë vetëm në botën e fëmijëve. Në vitin 1972, ai madje “kandidoi” simbolikisht për president të SHBA-së në një event humoristik në Disneyland. Në shekullin e 21-të, personazhi u përfshi pa dashje edhe në debatet politike në Kinë, pasi disa kritikë e krahasuan liderin Xi Jinping me Pooh, gjë që çoi në censurimin e referencave për personazhin në internet.
Ndërkohë, në vitin 2023, pasi skaduan disa masa mbrojtjeje të të drejtave të autorit në SHBA, Pooh u shfaq edhe në projekte të pazakonta, përfshirë një film horror me buxhet të ulët të titulluar “Winnie-the-Pooh: Blood and Honey”, që surprizoi industrinë me suksesin e tij në kinema.
Pavarësisht këtyre transformimeve, për shumë fansa Pooh mbetet një simbol i gëzimit dhe qetësisë. Animatori Mark Henn, i cili punoi në filmin e Disney-t “Winnie the Pooh” në vitin 2011, tha se ishte emocionuese të punonte me një personazh që kishte parë që në fëmijëri.
“Ai sjell gjithmonë gëzim,” tha Henn. “Pooh është i qetë dhe i butë, dhe edhe kur mërzitet, ruan një qetësi që njerëzit e duan dhe e ndjejnë pranë vetes.”
Me një shekull histori pas tij, Winnie the Pooh vazhdon të jetë një nga personazhet më të dashur në botë, duke u kujtuar fëmijëve dhe të rriturve se edhe mendimet më të thjeshta mund të mbartin mençurinë më të madhe.
(FRANCE 24 / AFP)
