Një nga hënat më intriguese të Saturnit, Enceladus, mund të jetë vendi më premtues në sistemin tonë diellor për zbulimin e formave të jetës jashtëtokësore. Një studim i ri i udhëhequr nga Universiteti i Oksfordit dhe i botuar në Science Advances tregon se nën sipërfaqen e akullt të kësaj hëne ekziston një oqean i madh me ujë të lëngshëm, i cili ka të gjitha kushtet për të mbështetur zhvillimin e jetës.
Analiza është bazuar në të dhënat e mbledhura nga misioni Cassini i NASA-s dhe agjencive hapësinore evropiane e italiane, që udhëtoi drejt Saturnit në vitin 1997 dhe përfundoi misionin në 2017. Për vite të tëra besohej se Enceladus lëshonte nxehtësi vetëm nga poli jugor, por studimi i ri tregon se nxehtësia del edhe nga poli verior, duke konfirmuar se oqeani nëntokësor është aktiv dhe i qëndrueshëm.
Studiuesit krahasuan vëzhgimet e bëra gjatë dimrit të vitit 2005 dhe verës së vitit 2015, duke matur energjinë që lëshohet nga uji i oqeanit në temperaturën rreth 0°C, drejt sipërfaqes së ngrirë ku temperaturat bien deri në -223°C. Rezultati është befasues: nga poli verior shpërndahen rreth 35 gigavat energji, e barabartë me fuqinë e 66 milionë paneleve diellore.
“Ky zbulim është jashtëzakonisht emocionues,” – shpjegon Carly Howett nga Universiteti i Oksfordit. – “Ai tregon se aktiviteti brenda Enceladusit ka qenë i qëndrueshëm për shumë kohë. Tani pyetja e madhe është: a ka ekzistuar oqeani mjaft gjatë që të ketë lindur jeta?”
Shkencëtarët besojnë se vendi ku takohen uji, nxehtësia dhe mineralet – si në Enceladus – është një mjedis ideal për krijimin e formave të thjeshta jetësore, të ngjashme me organizmat që mendohet se kanë lindur në oqeanet e hershme të Tokës.
Ky zbulim rihap debatin shkencor për planetin e ardhshëm të eksplorimit hapësinor dhe nxit shpresën se njerëzimi mund të jetë më afër se kurrë zbulimit të jetës jashtëtokësore.
(Burimi: ANSA)
