Presidenti i Ukrainës, Volodymyr Zelensky, deklaroi se do të takohet këtë fundjavë me presidentin amerikan Donald Trump, në një përpjekje për të ruajtur vrullin e përpjekjeve të udhëhequra nga Shtetet e Bashkuara për t’i dhënë fund luftës me Rusinë.
Sipas Zelenskyt, takimi pritet të zhvillohet në Florida, me shumë gjasë të dielën. Deri në këto momente, Shtëpia e Bardhë nuk ka dhënë një konfirmim zyrtar për axhendën apo zhvillimin e takimit. Në një postim në rrjetet sociale, presidenti ukrainas tha se bisedimet për paqen po ecin përpara dhe se “shumë gjëra mund të vendosen para Vitit të Ri”.
Duke folur më vonë për gazetarët, Zelensky theksoi se takimi me Trump do të ketë një agjendë të gjerë. Ai përmendi si pika kyçe të diskutimit dy çështjet më të ndjeshme të negociatave aktuale: fatin e rajonit lindor të Donbasit dhe kontrollin mbi një central bërthamor ukrainas të pushtuar nga forcat ruse.
Ukraina ka kërkuar prej javësh një takim të drejtpërdrejtë mes Zelenskyt dhe Trumpit, në kuadër të rifillimit të përpjekjeve diplomatike amerikane. Presidenti Trump kishte deklaruar më herët se do të takohej vetëm nëse palët do të ishin pranë arritjes së një marrëveshjeje paqeje.
Këtë javë, Zelensky prezantoi një plan të rishikuar me 20 pika për përfundimin e luftës, i zhvilluar në bashkëpunim me Shtetet e Bashkuara. Propozimi përfshin një sërë çështjesh, nga garancitë e sigurisë për Ukrainën deri te masat për parandalimin e agresionit të ardhshëm rus. Megjithatë, analistët vlerësojnë se mbetet e paqartë nëse Moska do ta pranojë këtë plan.
Nga ana tjetër, Rusia ka vijuar sulmet ushtarake. Të premten, autoritetet ukrainase raportuan se bomba ajrore ruse goditën një rrugë të frekuentuar në qytetin Kharkiv, duke shkaktuar viktima dhe dëme materiale. Zelensky tha se këto sulme tregojnë mungesën e gatishmërisë së Kremlinit për kompromis.
Presidenti ukrainas u shpreh se është i gatshëm të diskutojë edhe lëshime të vështira, përfshirë çështje territoriale, por paralajmëroi se refuzimi i Rusisë për paqe duhet të pasohet nga presion më i fortë ndërkombëtar, sanksione të reja dhe mbështetje më e madhe ushtarake për Kievin. Ai shtoi se këto çështje do të jenë pjesë e bisedës së tij me presidentin amerikan.
Ndërkohë, presidenti rus Vladimir Putin ka vazhduar të mbajë një qëndrim të ashpër në negociata, duke kërkuar lëshime të mëdha territoriale nga Ukraina dhe masa që, sipas Kievit, do të cenonin sovranitetin e vendit.
Zelensky tha se diplomacia në javët në vijim pritet të jetë intensive dhe se qëllimi i tij është të tregojë se Ukraina është e gatshme për një paqe të drejtë dhe të qëndrueshme, ndërsa përgjegjësia për dështimin e negociatave do të binte mbi Rusinë nëse ajo refuzon marrëveshjen.
(Burimi: The New York Times)
