Presidenti i Ukrainës, Volodymyr Zelensky, deklaroi se sulmi masiv rus ndaj Kievit dy netë më parë është një provë e qartë se Moska “nuk dëshiron paqe”, në një moment kur pritet rifillimi i bisedimeve diplomatike për t’i dhënë fund luftës.
Komentet Zelensky i bëri teksa ishte rrugës drejt Floridës, ku pritet të takohet me presidentin amerikan Donald Trump, për të diskutuar një plan të ri paqeje me 20 pika, të hartuar nga përfaqësues amerikanë dhe ukrainas.
Sipas autoriteteve lokale, sulmi rus që zgjati rreth 10 orë përfshiu raketa dhe dronë të shumtë, duke shkaktuar vdekjen e dy personave dhe plagosjen e të paktën 32 të tjerëve. Dëmet në infrastrukturën energjetike lanë rreth 40% të ndërtesave të banimit në Kiev dhe zonat përreth pa ngrohje, në kulmin e dimrit, bëri të ditur ministri ukrainas i Zhvillimit Rajonal, Oleksiy Kuleba.
Zelensky tha se Rusia përdori pothuajse 500 dronë dhe rreth 40 raketa, duke goditur jo vetëm objektiva energjetike, por edhe infrastrukturë civile. “Përfaqësuesit rusë flasin për negociata, por në realitet janë raketat dhe dronët që flasin në emër të tyre”, shkroi ai në Telegram. Sipas tij, presidenti rus Vladimir Putin nuk ka asnjë vullnet për t’i dhënë fund luftës.
Ai u bëri thirrje aleatëve perëndimorë që të reagojnë me vendosmëri. “Amerika e ka këtë mundësi, Evropa e ka këtë mundësi, partnerët tanë e kanë këtë mundësi. Duhet treguar forcë ndaj agresionit”, theksoi Zelensky.
Shërbimi Shtetëror i Emergjencave i Ukrainës njoftoi se 68 persona u evakuuan nga një azil pleqsh në rrethin lindor Darnytskyi të Kievit. Pamjet nga vendngjarja treguan ndërtesa banimi të dëmtuara rëndë dhe shtëpi të përfshira nga flakët. Mes objekteve të goditura ishte edhe pallati ku banon gazetarja e BBC-së, Anastasiya Gribanova, e cila shpëtoi pa lëndime.
Nga ana e saj, Ministria e Mbrojtjes e Rusisë deklaroi se kishte përdorur armë precize me rreze të gjatë veprimi për të goditur objekte energjetike që, sipas saj, përdoreshin nga ushtria dhe industria ushtarake ukrainase. Moska pretendoi gjithashtu se kishte rrëzuar rreth 200 dronë ukrainas mbi disa rajone ruse, përfshirë edhe zonën e Moskës.
Sulmi vuri në gatishmëri edhe Poloninë, e cila ngriti avionët luftarakë dhe sistemet e mbrojtjes ajrore për shkak të afërsisë me hapësirën ajrore ukrainase, megjithatë autoritetet polake konfirmuan se nuk pati shkelje të territorit të tyre.
Në planin diplomatik, drafti i ri me 20 pika për paqen është një version i rishikuar i një propozimi të mëparshëm me 28 pika, i cili ishte kritikuar si shumë i favorshëm për Rusinë. Zelensky e ka quajtur dokumentin e ri “themelor për përfundimin e luftës”, ndërsa Trump ka paralajmëruar se asgjë nuk është përfundimtare pa miratimin e tij.
Sipas mediave amerikane, plani përfshin garanci sigurie nga SHBA-të, NATO-ja dhe aleatët evropianë, për një reagim të koordinuar në rast të një agresioni të ri rus. Çështja e kontrollit të rajonit lindor të Donbasit mbetet pika më e ndjeshme, megjithëse Zelensky ka lënë të hapur mundësinë e krijimit të një “zone të lirë ekonomike” si kompromis.
Trump ka deklaruar se pret ta shqyrtojë draftin e ri dhe se beson se ai mund të pranohet si nga Zelensky, ashtu edhe nga presidenti rus Vladimir Putin, me të cilin tha se pret të flasë “së shpejti”.
(Burimi: BBC)
