Sot, prej orës 7:00, janë hapur qendrat e votimit për 334.539 qytetarë të cilët do të votojnë në 5 bashki të vendit për zgjedhjet e pjesshme vendore.
Qytetarët me të drejtë vote do të zgjedhin kryebashkiakët e rinj në Vlorë, Berat, Cërrik, Mat e Tepelenë, ku në garë janë 13 kandidatë.
Qendrat e votimit do të qëndrojnë të hapura deri në orën 18:00, sipas përcaktimeve të Kodit Zgjedhor për zgjedhjet “dimërore”.
612 punonjës policie janë angazhuar për mbarëvajtjen e procesit zgjedhor në të 5 bashkitë.
Në Vlorë, numri i qytetarëve me të drejtë vote është afërsisht 172 mijë, në Berat mbi 82 mijë, në Cërrik afro 39 mijë, në Mat 29 mijë, ndërsa në Tepelenë, 12 mijë.
Për herë të parë, në bashkinë e Tepelenës, do të aplikohet si test inteligjenca artificiale në numërimin e votave.
Karakteristike e këtyre zgjedhjeve pjesore është fakti se fushata zgjedhore kaloi në heshtje dhe dy liderët e partive kryesore, Edi Rama dhe Sali Berisha, nuk morën pjesë në asnjë miting.
PD dhe opozita zyrtarisht nuk kanë kandidatë të regjistruar nga partitë e tyre, por kanë deklaruar mbështetjen për disa emra të cilët janë shpallur si të pavarur.
Në Cërrik, Florenc Doka i PS do të kandidojë përballë kandidatit të pavarur Amarildo Hoxha, për të cilin ka deklaruar mbështetjen edhe PD. Në këtë bashki do të ketë edhe një kandidat të tretë, nën logon e partisë “Lëvizja Shqipëria Bëhet”, Eligert Hima.
Një garë treshe do të ketë edhe në bashkinë e Matit. Altin Bojni do të jetë kandidati socialist, ndërsa një tjetër socialiste ka sfiduar propozimin e Ramës duke shpallur kandidaturën e pavarur, ish-kryetarja e Gruas në PS-në lokale, Suzana Pasha. Ndërkohë që PD dhe opozita mbështet kandidaturën e pavarur të Eduart Brahilikës.
Në Vlorë, Brunilda Mersini e PS, e cila la mandatin e deputetes për kandidimin si kryebashkiake, do të garojë përballë dy demokratëve, kandidatit të mbështetur nga PD, Dionis Sota, teksa në garë do të jetë edhe Gjergj Nika, anëtari i Këshillit Bashkiak, përsëri nga PD.
Në Berat, PS ka propozuar kandidatin Ervin Ceca, i cili do të jetë përballë Pavlo Shkarpës.
Në Tepelenë kandidati i PS, Gramoz Sako, është në garë me të pavarurin e mbështetur nga PD, Gabriel Guma.
Në këto zgjedhje pjesore pritet një pjesëmarrje e ulët dhe mungesë interesimi për votim, parashikim që po vërtetohet deri tani, orët e para të mëngjesit.
Vetëm 2.37% e qytetarëve kanë votuar deri në orën 09:00 sipas KQZ.
Në Bashkinë e Vlorës, deri në orën 09:00, pjesëmarrja është 1.33%, një shifër tepër e ulët.
Në Mat kanë votuar vetëm 6.47% e votuesve.
Pjesëmarrja deri në orën 09:00:
Vlorë 1.33%
Berat 2.35%
Mat 6.47%
Cërrik 2.9%
Tepelenë 4.4%
