Zvicra pritet të mbajë më 14 qershor një referendum të rëndësishëm mbi një propozim për kufizimin e popullsisë në 10 milionë banorë, në një kohë kur emigracioni po shkakton përçarje të forta politike në vend.
Nisma është paraqitur nga Partia Popullore Zvicerane (SVP), forca më e madhe politike në vend, e cila argumenton se rritja e shpejtë e popullsisë po ushtron presion mbi shërbimet publike, infrastrukturën dhe tregun e banesave. Aktualisht, vendi numëron rreth 9.1 milionë banorë.
Sipas propozimit, qeveria do të duhet të ndërhyjë sapo popullsia të arrijë në 9.5 milionë, duke refuzuar hyrjen për të sapoardhurit — përfshirë azilkërkuesit dhe familjarët e shtetasve të huaj që jetojnë në vend. Nëse kufiri prej 10 milionë banorësh tejkalohet, autoritetet do të detyrohen të ndërpresin marrëveshjen për lëvizjen e lirë me Bashkimi Evropian.
Megjithëse nuk është anëtare e BE-së, Zvicra është e lidhur ngushtë me bllokun përmes më shumë se 120 marrëveshjeve dypalëshe, të cilat i sigurojnë akses në tregun e vetëm dhe lehtësojnë lëvizjen e njerëzve dhe mallrave. Një prishje e marrëveshjes së lëvizjes së lirë mund të ketë pasoja të rëndësishme ekonomike, duke qenë se BE është partneri më i madh tregtar i vendit.
SVP ka fituar çdo zgjedhje kombëtare që nga viti 1999 dhe mbetet e vetmja parti brenda Këshillit Federal që mbështet kufizimin e popullsisë. Qeveria federale, një koalicion me shtatë anëtarë që vendos me shumicë votash, është shprehur kundër iniciativës.
Megjithatë, një sondazh i kryer vitin e kaluar nga kompania zvicerane Leewas sugjeron se ideja gëzon mbështetje të konsiderueshme në publik.
Sistemi zviceran i demokracisë direkte lejon që propozime të tilla të hidhen në votim nëse mbledhin të paktën 100 mijë nënshkrime nga votuesit brenda 18 muajve — një prag që kjo iniciativë e ka kaluar.
Në përpjekje për të bindur elektoratin, SVP publikoi në rrjetin social X një imazh të krijuar me inteligjencë artificiale, ku paraqitej një elitë e pasur duke festuar mbi një turmë punëtorësh të pakënaqur. Mesazhi shoqërues pretendonte se “një elitë e vogël ekonomike përfiton nga imigracioni i tepërt, ndërsa shumica e popullsisë zvicerane vuan”.
Referendumi pritet të jetë një test i rëndësishëm për politikën e emigracionit në Zvicër dhe mund të ndikojë drejtpërdrejt në marrëdhëniet e saj me Evropën.
(Burimi: CNN)
