Unioni Kombëtar i Konsumatorëve (UNC) ka publikuar analizën vjetore të shpenzimeve për Krishtlindje dhe panorama është e qartë: edhe këtë vit, fëmijët dominojnë festimet, duke e çuar kategorinë e lodrave në vendin e parë të shitjeve.
Pas lodrave, në krye të listës qëndrojnë produktet e kujdesit personal — parfumet, setet kozmetike, kremrat për fytyrën e trupin, apo paketat e grimit — ndër dhuratat më të preferuara. Më tej renditen produktet e shkrimit, si libra, kalendarë, stilolapsa dhe ditarë, të cilat mbeten dhurata klasike, sidomos nga kompanitë.
Në vijim të renditjes, qëndrueshmëria e mallrave shtëpiake vijon të ketë peshë: enë kuzhine, qelqurina, porcelan, qeramikë. Ndërkohë, këpucët, artikujt prej lëkure dhe aksesorët e udhëtimit kanë njohur rikthimin më të fortë që prej vitit 2016 — nga valixhet te portofolët e çantat elegante, të gjitha shihen si dhurata praktike dhe të përdorshme.
Teknologjia, si çdo vit, nuk mungon: telefonat, kompjuterët, tabletët, lojërat elektronike dhe pajisjet smart vijojnë të jenë ndër zgjedhjet më të kërkuara. Menjëherë pas tyre renditen pajisjet elektroshtëpiake — nga televizorët e deri te makineritë e kafesë apo fshesat me korrent. Fotografia, optika dhe instrumentet muzikorë ruajnë gjithashtu një vend të rëndësishëm, duke u paraprirë kategorive luksoze si bizhuteritë, orët, lulet dhe kornizat.
Në fund të dhjetëshes ndodhen veshjet, përfshirë aksesorët si dorezat, shallet dhe kravatat, që pavarësisht thjeshtësisë, mbeten zgjedhje të shpeshta dhuratash.
Ndërkohë, mobiljet dhe tekstilet e shtëpisë renditen jashtë dhjetëshes, në vend të njëmbëdhjetë, ndërsa ushqimet dhe pijet — përfshirë panetonen, pandoron, verërat dhe çokollatat — ndodhen në fund të listës. Jo sepse janë më pak të dëshiruara, por sepse shpenzimet për ushqime janë të vazhdueshme gjatë gjithë vitit dhe rritja sezonale është më e vogël krahasuar me produktet tipike festive.
Presidenti i UNC-së, Massimiliano Dona, e përmbledh qartë situatën: “Kjo nuk është një renditje e dhuratave më të dëshiruara, por e atyre që blihen më shpesh. Dhe krahasuar me kategorinë e parë, konfirmohet edhe një herë që fëmijët janë protagonistët e padiskutueshëm të Krishtlindjeve.”
(Burimi: TGCOM)
