Autoritetet britanike kanë urdhëruar tërheqjen nga tregu të disa shisheve të pijeve alkoolike Disaronno Originale, pasi ekziston dyshimi se mund të kenë copa të vogla qelqi brenda, duke i bërë ato të pasigurta për konsum.
Agjencia e Standardeve Ushqimore (FSA) njoftoi se tërheqja prek shishet 700 ml të shitura në Angli dhe Skoci. Kompania prodhuese, Illva Saronno, ka identifikuar shtatë lote të dyshuara pas një “anomalie në linjën e shisheve”, që mund të ketë sjellë kontaminimin.
Shishet e prekura kanë kodet e mëposhtme:
25374, 25375, 25381, 25382, 25435, 25442 dhe 25444.
Konsumatorët këshillohen t’i kontrollojnë numrat në pjesën e pasme të shishes dhe të mos i konsumojnë nëse përputhen.
Dyqanet ku produkti është shitur do të vendosin njoftime zyrtare me udhëzime për klientët. Tërheqja pason një paralajmërim identik të publikuar një ditë më parë në Irlandë për të njëjtën pije.
Kujdes! Festat po afrojnë — tregohuni të vëmendshëm nëse ju sjellin dhuratë një shishe Disaronno nga Anglia. Kontrolloni kodin para se ta konsumoni.
(Burimi: BBC)
