Shtetet e Bashkuara të Amerikës festojnë sot 4 Korrikun, Ditën e Pavarësisë, që shënon miratimin e Deklaratës së Pavarësisë më 4 korrik 1776 dhe lindjen e një prej demokracive më të fuqishme në botë.
Për shqiptarët, kjo datë ka një domethënie që shkon përtej festës kombëtare amerikane. SHBA ka qenë ndër aleatët më të rëndësishëm të Shqipërisë dhe shqiptarëve në momentet kyçe të historisë moderne.
Nga mbështetja e fuqishme e presidentit Woodrow Wilson, i cili në vitin 1919 kundërshtoi copëtimin e Shqipërisë në Konferencën e Paqes në Paris, te roli vendimtar i SHBA-së në ndërhyrjen e NATO-s në Kosovë në vitin 1999 dhe mbështetja e vazhdueshme për integrimin euroatlantik të Shqipërisë, marrëdhëniet mes dy vendeve janë ndërtuar mbi një partneritet të qëndrueshëm.
Pas rënies së komunizmit, Shtetet e Bashkuara kanë qenë një mbështetëse e rëndësishme e reformave demokratike, forcimit të institucioneve, anëtarësimit të Shqipërisë në NATO dhe proceseve të shtetit të së drejtës.
Sot, Shqipëria dhe SHBA vazhdojnë të bashkëpunojnë ngushtë, ndërsa lidhjet mes dy popujve janë forcuar edhe nga komuniteti i madh shqiptaro-amerikan, i cili ka luajtur një rol të rëndësishëm në afrimin e dy vendeve.
Në këtë 4 Korrik, urimi për popullin amerikan shoqërohet edhe me kujtesën për një miqësi historike që, në shumë momente vendimtare, ka ndikuar drejtpërdrejt në fatet e Shqipërisë dhe shqiptarëve.
