Prokurorët gjermanë deklaruan të enjten se shpërthimi i gazsjellësve Nord Stream 1 dhe Nord Stream 2 në Detin Baltik, në vitin 2022, ishte organizuar me urdhër të autoriteteve shtetërore të Ukrainës.
Në një deklaratë lidhur me akuzat e ngritura ndaj të dyshuarit Serhii K., prokuroria tha se ai dhe gjashtë bashkëpunëtorë të tij “vepruan me urdhër të autoriteteve shtetërore të Ukrainës”.
Sipas hetuesve, Serhii K., tashmë 50 vjeç, ishte në atë kohë oficer i ushtrisë ukrainase, ndërsa edhe bashkëpunëtorët e tij ishin pjesëtarë të forcave të armatosura.
Prokuroria gjermane pretendon se objektivi i operacionit ishte shkatërrimi i gazsjellësve Nord Stream 1 dhe Nord Stream 2, me synimin për të ndërprerë përfundimisht furnizimin me gaz natyror përmes tyre dhe për t’i hequr Rusisë të ardhurat nga eksporti i gazit, të cilat, sipas saj, përdoreshin për financimin e luftës.
Çështja konsiderohet veçanërisht delikate për Gjermaninë, e cila është një nga mbështetëset më të mëdha ushtarake të Ukrainës në luftën kundër Rusisë. Para nisjes së luftës, Gjermania siguronte një pjesë të konsiderueshme të nevojave të saj energjetike përmes gazit rus.
Autoritetet ukrainase deklaruan se nuk disponojnë informacion të mjaftueshëm për çështjen për t’iu përgjigjur në detaje pretendimeve të prokurorisë gjermane.
Si u krye operacioni
Sipas hetimeve, Serhii K. dhe ekipi i tij udhëtuan nga Ukraina drejt Gjermanisë duke përdorur pasaporta false ukrainase dhe morën me qira jahtin “Andromeda” nga një kompani gjermane në qytetin verior të Rostockut.
Hetuesit thanë se në bord të jahtit u gjetën gjurmë të eksplozivëve ushtarakë HMX dhe RDX, të cilët, sipas akuzës, u vendosën me mekanizma kohorë në tubacionet nënujore pranë ishullit danez të Bornholmit më 22 shtator 2022.
Katër ditë më vonë, më 26 shtator, eksplozivët shpërthyen, duke shkaktuar dëme të mëdha në të dy gazsjellësit. Në momentin e shpërthimit, tubacionet nuk ishin në funksion.
“Para incidentit, rreth gjysma e furnizimit vjetor të Gjermanisë me gaz natyror transportohej përmes Nord Stream 1,” theksoi prokuroria.
I dyshuari mohon akuzat
Mediat gjermane raportuan se Serhii K. është akuzuar për bashkëpunim në një krim lufte, ndërprerje të shërbimeve publike, shkaktim shpërthimi dhe shkatërrim të infrastrukturës.
Akuzat u ngritën pasi ai u ekstradua në Gjermani nga Italia, ku ishte arrestuar në gusht të vitit 2025 mbi bazën e një urdhër-arresti gjerman.
Serhii K. i ka mohuar të gjitha akuzat, ndërsa avokati i tij deklaroi për agjencinë Reuters se është i bindur se klienti i tij do të shpallet i pafajshëm.
Burimi: DW
