Britania u trondit mbrëmjen e së shtunës nga një sulm i përgjakshëm me thikë në një tren që udhëtonte drejt Londrës, në qendër të Anglisë – një ngjarje që kryeministri Keir Starmer e përshkroi si “jashtëzakonisht shqetësuese”. Nëntë persona mbetën të plagosur rëndë, ndërsa një prej tyre po lufton për jetën në spital. Policia e Transportit Britanik e shpalli ngjarjen “incident madhor”.
Dy persona u arrestuan fillimisht vetëm disa minuta pas telefonatës së parë të emergjencës, por të dielën në mbrëmje policia njoftoi se vetëm njëri prej tyre po trajtohet si i dyshuar. Një 32-vjeçar britanik mbetet në paraburgim, i arrestuar për “tentativë vrasjeje”, ndërsa një 35-vjeçar me origjinë nga Karaibet është liruar pa asnjë akuzë të mëtejshme. Policia po heton motivin e sulmit, por ka deklaruar se nuk ka prova që ngjarja lidhet me terrorizëm.
Treni i shpejtë i kompanisë London North Eastern Railway (LNER) ishte nisur nga qyteti verior Doncaster në orën 18:25 me destinacion Londrën, dhe sulmi ndodhi pak pasi treni u nis nga stacioni Peterborough, në Cambridgeshire.
Policia mori telefonatën e parë në orën 19:42 dhe brenda tetë minutash, pasi treni ndaloi në mënyrë të paplanifikuar në stacionin Huntingdon, arrestoi dy të dyshuar. Forcat e armatosura evakuuan udhëtarët dhe siguruan perimetrin për të eliminuar çdo kërcënim të mundshëm.
Në total, 11 persona morën trajtim mjekësor. Dhjetë u dërguan me urgjencë në spital – nëntë prej tyre në gjendje të rёndё për jetën. Një prej viktimave, punonjës i LNER-it që ishte në detyrë, u plagos rëndë ndërsa përpiqej të ndalonte sulmuesin. Policia tha se pamjet nga kamerat e trenit tregojnë qartë se veprimet e tij ishin heroike dhe shpëtuan shumë jetë.
Nga dy personat e arrestuar fillimisht, vetëm një 32-vjeçar britanik me ngjyrë nga Peterborough – po mbahet ende nga policia dhe konsiderohet si i vetmi i dyshuar. Ai kishte hipur në tren pak para nisjes së sulmit. Ekspertët po analizojnë jetёn e të arrestuarit dhe ngjarjet që e çuan tё ndёrmerrte sulmin.
Ngjarje të tilla janë të rralla në Mbretërinë e Bashkuar, ku shkalla e vrasjeve mbetet ndër më të ulëtat në Evropë. Krimet me armë zjarri janë shumë të rralla – me rreth 5,100 raste të regjistruara në vitin e fundit – por krimet me thikë janë rritur që prej vitit 2011. Vetëm në Angli dhe Uells, deri në qershor 2025 u regjistruan 51,527 raste, prej të cilave 15,689 në Londër.
Treni udhëtonte në linjën East Coast Main Line, një nga rrugët më të ngarkuara hekurudhore në Britani, që lidh Londrën me Edinburgun përmes qyteteve kryesore të vendit.
