Gjykata Kushtetuese ka marrë sot një vendim me rëndësi të madhe politike dhe institucionale, duke rrëzuar vendimin e Qeverisë për shkarkimin e Erion Veliajt nga detyra e kryetarit të Bashkisë së Tiranës.
Sipas burimeve, vendimi është marrë me shumicë votash, 5 me 3, në favor të Veliajt, duke konfirmuar se procesi i shkarkimit të tij nuk ka qenë në përputhje me Kushtetutën dhe kompetencat përkatëse.
Me këtë vendim, Gjykata Kushtetuese i jep fund përkohësisht një prej krizave më të diskutueshme të muajit të fundit, duke konfirmuar qёndrimin e Veliajt në detyrë.
Në të njëjtën kohë, Gjykata ka anuluar dekretin e Presidentit Bajram Begaj për caktimin e datës së zgjedhjeve të reja në Tiranë, duke e bërë të pavlefshëm procesin zgjedhor të parashikuar për muajin dhjetor.
Ky vendim pritet të ketë ndikim të gjerë politik, pasi vjen pas një përballjeje të fortë mes tre institucioneve kryesore të vendit — Kryeministrisë, Presidencës dhe Bashkisë së Tiranës — dhe pas një procesi që ka mbajtur për javë me radhë vëmendjen e opinionit publik.
Burime pranë Gjykatës bëjnë me dije se vendimi është shpallur pas diskutimeve të gjata dhe balancave të ndjeshme mes anëtarëve të trupës gjykuese. Nё fund, me sa duket, Gjykata Kushtetuese ka theksuar rëndësinë e respektimit të kompetencave institucionale dhe të ndarjes së pushteteve në këtë rast.
Vendimi pritet të publikohet zyrtarisht në ditët në vijim me argumentimin e plotë ligjor, por në aspektin praktik, Erion Veliaj mbetet në detyrë dhe vazhdon mandatin si kryebashkiak i Tiranës.
Ky është një zhvillim që jo vetëm ndryshon ekuilibrat politikë në kryeqytet, por edhe shënon një precedent të rëndësishëm për marrëdhënien mes pushtetit vendor dhe atij qendror në Shqipëri.
