Për herë të parë që nga nisja e pushtimit të Ukrainës në vitin 2022, Vladimir Putin ka lënë të kuptohet publikisht se lufta mund të jetё duke shkuar drejt fundit. Gjatë ceremonive të Ditës së Fitores në Moskë, presidenti rus deklaroi shkurt se çështjes sё konfliktit ukrainas “po i vjen fundi”, një frazë që në Kremlin nuk konsiderohet aspak rastësore.
Deklarata erdhi në një moment simbolik, në paradën më të rëndësishme ushtarake të Rusisë, ku zakonisht Putini përsërit retorikën e fortë për vazhdimin e “operacionit special ushtarak” deri në arritjen e objektivave maksimaliste të Moskës. Por këtë herë toni ishte ndryshe.
Në vend të triumfalizmit, Kremlini dukej sikur po përpiqej të ushqente idenë se një zgjidhje diplomatike mund të jetë afër, sidomos përballë administratës së Donald Trump në SHBA, që prej muajsh ka shtyrë narrativën se lufta mund të mbyllet me negociata.
Një tjetër detaj që tërhoqi vëmendjen ishte sugjerimi i Putinit për rikthimin në skenë të ish-kancelarit gjerman Gerhard Schröder si ndërmjetës për bisedime të mundshme me Europën. Schröder, një prej figurave më të afërta me Kremlinin në Perëndim, mbetet figurë shumë e kontestuar për shkak të lidhjeve të tij me projektet energjetike ruse dhe vetë Putinin.
Por pas toneve diplomatike fshihet një realitet gjithnjë e më i rëndë për Moskën.
Sipas analizave që po qarkullojnë në mediat ndërkombëtare, Rusia po përballet me një lodhje të dukshme ekonomike, sociale dhe ushtarake. Kritikat ndaj luftës po bëhen më të hapura edhe brenda elitës ruse, ndërsa kostot njerëzore dhe financiare të konfliktit po rëndojnë çdo muaj më shumë mbi Kremlinin.
Në paradën e këtij viti në Sheshin e Kuq u vu re edhe mungesa e theksuar e pajisjeve të rënda ushtarake që tradicionalisht dominonin ceremoninë. Në vend të tankeve dhe demonstrimeve të fuqisë, parada u mbështet kryesisht tek trupat ushtarake, një detaj që shumë analistë e lexuan si shenjë të konsumimit të kapaciteteve të Rusisë pas katër vitesh lufte.
Në të njëjtën kohë, Ukraina po vazhdon të rezistojë falë përdorimit masiv të teknologjisë dhe dronëve në vijën e frontit. Kievi ka arritur të kompensojë mungesën e burimeve njerëzore me zhvillimin e sistemeve pa pilot, të cilat kanë ngadalësuar ndjeshëm avancimin rus.
Madje, sipas raportimeve, vendet e Gjirit Persik i janë drejtuar Ukrainës për ndihmë teknologjike në mbrojtjen kundër dronëve iranianë, çka konsiderohet një tregues i nivelit të avancimit që ka arritur industria ushtarake ukrainase gjatë luftës.
Megjithatë, pavarësisht sinjaleve të reja nga Moska, askush nuk beson ende se fundi i konfliktit është afër. Rusia vazhdon të grumbullojë trupa përgjatë frontit dhe situata mbetet tepër e paqëndrueshme.
Por për herë të parë, edhe vetë Putini duket se po pranon indirekt një realitet që deri dje refuzohej të artikulohej në Kremlin: se as Rusia nuk ka burime të pafundme dhe se çdo luftë, herët a vonë, arrin në fundin e saj.
(Burimi: CNN)
