Elon Musk kërkoi kontroll të plotë mbi OpenAI dhe madje sugjeroi që kompania e inteligjencës artificiale t’u kalonte fëmijëve të tij pas vdekjes së tij. Kështu dëshmoi në gjykatë Sam Altman, drejtori ekzekutiv dhe bashkëthemeluesi i OpenAI, gjatë procesit gjyqësor mes kompanisë dhe miliarderit amerikan.
Duke folur para një jurie federale në Oakland të Kalifornisë, Altman tregoi se Musk jo vetëm mbështeste idenë që OpenAI të shndërrohej në një kompani fitimprurëse, por kërkonte edhe kontroll afatgjatë mbi të.
“Një moment veçanërisht tronditës ishte kur bashkëthemeluesit e mi e pyetën: ‘Nëse ke kontrollin, çfarë ndodh kur të vdesësh?’ Dhe ai tha diçka si: ‘Ndoshta duhet t’u kalojë fëmijëve të mi’”, deklaroi Altman në sallën e gjyqit.
Sipas tij, Musk kishte propozuar disa mënyra për të marrë drejtimin e OpenAI pas krijimit të saj në vitin 2015. Përveç kërkesës për më shumë vende në bord dhe rol drejtues, Musk kishte sugjeruar edhe që OpenAI të bëhej një degë e Tesla-s, kompanisë së tij të automjeteve elektrike.
Altman tha se objektivi kryesor në atë periudhë ishte sigurimi i financimeve të mëdha dhe të shpejta për zhvillimin e inteligjencës artificiale, por Musk mendonte se vetëm ai mund ta garantonte këtë për shkak të ndikimit të tij publik.
“Nëse bëj një postim në Twitter për këtë, menjëherë merr vlerë”, kujtoi Altman një prej komenteve të Musk.
Megjithatë, ai tha se vetë Altman, Greg Brockman dhe Ilya Sutskever refuzuan t’i jepnin Musk kontrollin që kërkonte, sepse kjo binte ndesh me filozofinë mbi të cilën ishte themeluar OpenAI.
“Një nga arsyet pse krijuam OpenAI ishte sepse nuk mendonim se një person i vetëm duhet të kontrollojë inteligjencën e përgjithshme artificiale”, tha ai. “Ndihesha jashtëzakonisht në siklet me këtë ide.”
Çështja lidhet me padinë që Musk ka ngritur kundër OpenAI dhe Altmanit, ku pretendon se kompania ka tradhtuar misionin fillestar jofitimprurës dhe është kthyer në një biznes privat që ndjek interesa komerciale.
Altman dëshmoi se Musk ishte plotësisht në dijeni dhe mbështeste transformimin e OpenAI në një strukturë fitimprurëse, për sa kohë ai vetë do të kishte kontrollin.
Në fund, Musk u largua nga OpenAI në fillim të vitit 2018 dhe ndaloi financimet tremujore prej 5 milionë dollarësh që jepte për kompaninë.
Altman tregoi gjithashtu se një email i Musk i ka mbetur “i ngulitur në kujtesë”, ku miliarderi shkruante se OpenAI kishte “zero për qind shanse për sukses” pa të.
Kur OpenAI krijoi degën e saj fitimprurëse në vitin 2019 dhe i ofroi Muskut mundësinë për të investuar, ai refuzoi.
“Sipas tij, nuk investonte më në startup-e që nuk i kontrollonte vetë”, tha Altman.
(Burimi: BBC)
