Tensionet mes Kubës dhe Shteteve të Bashkuara duket se kanë hyrë në një fazë të re përshkallëzimi, ndërsa në Havana po rikthehet frika e vjetër e një përballjeje të drejtpërdrejtë me Uashingtonin. Kriza ekonomike, mungesat ekstreme dhe presioni amerikan po e shtyjnë ishullin komunist drejt një situate gjithnjë e më të paqëndrueshme.
Në jetën e përditshme të kubanezëve, pasojat janë tashmë të dukshme. Ndërprerjet e energjisë elektrike zgjasin me orë të tëra, mungojnë karburantet, ilaçet dhe madje edhe produktet bazë si letra higjienike. Në shumë lagje të Havanës, mbeturinat grumbullohen në rrugë, ndërsa ushqimet prishen në frigoriferë për shkak të mungesës së energjisë.
Vizita e fundit në Havana e drejtorit të CIA-s, John Ratcliffe, konsiderohet nga shumë kubanezë si sinjali më i fortë deri tani se marrëdhëniet mes dy vendeve po afrohen drejt një pike kritike. Ratcliffe mbërriti në Kubë me një avion të identifikuar hapur me mbishkrimin “United States of America”, një detaj që në ishull u interpretua si demonstrim force.
Sipas raportimeve, zyrtarët amerikanë akuzuan Kubën për bashkëpunim me Rusinë dhe Kinën, duke pretenduar se në ishull ekzistojnë poste përgjimi që cenojnë interesat amerikane në rajon. Nga ana tjetër, autoritetet kubane u përpoqën të bindnin delegacionin amerikan se Kuba nuk përbën kërcënim për SHBA-të dhe kërkuan lehtësimin e bllokadës ekonomike dhe të naftës që ka paralizuar ekonominë e vendit.
Por menjëherë pas largimit të Ratcliffe nga Havana, mediat amerikane raportuan se prokurorët federalë po shqyrtojnë mundësinë e ngritjes së një padie ndaj ish-presidentit kubanez Raul Castro për rrëzimin e dy avionëve të organizatës “Brothers to the Rescue” në vitin 1996. Një veprim i tillë do të konsiderohej një përshkallëzim i paprecedentë diplomatik dhe politik.
Në ishull, frika për trazira apo edhe konflikt të hapur po shtohet. Autoritetet kubane kanë nisur të shpërndajnë udhëzues për qytetarët mbi mënyrën se si duhet të veprojnë “në rast të një agresioni ushtarak hipotetik kundër Kubës”, duke këshilluar familjet të përgatisin çanta emergjence me ushqime dhe sende bazë.
Historianë dhe ekspertë paralajmërojnë se çdo përpjekje për rrëzimin e regjimit në Havana mund të sjellë pasoja të rënda dhe valë hakmarrjesh politike. Ndërkohë, shumë kubanezë të lodhur nga varfëria dhe mungesat ekstreme shprehen se jetojnë prej kohësh në një krizë pa fund.
“Nëse gjysma prej nesh vdes, të paktën gjysma tjetër do të jetojë në paqe”, tha një protestuese gjatë demonstratave për mungesën e energjisë elektrike në Havana.
(Burimi: Lajmi është përshtatur nga një analizë e CNN mbi tensionet mes SHBA-së dhe Kubës dhe situatën e rënduar ekonomike në ishull.)
