Shtëpia italiane e modës Gucci e ktheu Times Square në New York në një pasarelë gjigante mode, në një shfaqje spektakolare që synon të rikthejë shkëlqimin e humbur të markës, ndërsa shitjet vijojnë të bien.
Në zemër të Manhattan-it, mes ekraneve gjigante dhe reklamave ikonike me neon, Gucci prezantoi koleksionin e ri “Cruise”, të dytin të firmosur nga drejtori i ri kreativ Demna Gvasalia, stilisti gjeorgjian i marrë nga Balenciaga për të ringjallur markën luksoze italiane.
Për eventin, Gucci privatizoi një pjesë të Times Square, duke e transformuar rrugën në një pasarelë të hapur ku modelet parakalonin mes turistëve, kamerave dhe mijëra kalimtarëve që ndoqën spektaklin nga afër.
Shfaqja solli rikthimin e estetikës provokuese që dikur e bëri Gucci-n një fenomen global, me referenca të forta nga vitet ’70 dhe ’80, si edhe nga epoka legjendare e Tom Ford.
Në koleksion dominonin lëkura, sateni, printet leopard, gëzofi, siluetat e ngushta dhe takat ekstreme, duke rikthyer imazhin seksi dhe ekstravagant që marka kërkon të rikthejë në qendër të modës globale.
Në pasarelë u shfaqën emra të njohur si Cindy Crawford, Paris Hilton dhe ish-ylli i NFL-së Tom Brady, ndërsa në publik ishin Kim Kardashian, Mariah Carey, Shawn Mendes dhe reperi britanik Stormzy.
Pas gjithë këtij spektakli fshihet një betejë e rëndësishme ekonomike për grupin francez Kering, pronari i Gucci-t. Marka përfaqëson rreth 40% të të ardhurave të grupit, por prej vitesh po përballet me rënie të fortë të shitjeve.
Vetëm në tremujorin e parë të vitit 2026, Gucci regjistroi një tjetër rënie prej 14%, me shitje që zbritën në 1.35 miliardë euro.
Drejtuesi i Kering, Luca de Meo, ka deklaruar se objektivi kryesor i grupit është “ta bëjë Gucci-n sërish të domosdoshëm”.
(Burimi: AFP)
