Bolivia po përballet me krizën më të rëndë ekonomike të katër dekadave të fundit, ndërsa protestat kundër presidentit Rodrigo Paz janë përshkallëzuar në dhunë, përplasje me policinë dhe sulme ndaj institucioneve shtetërore në kryeqytetin La Paz.
Mijëra fermerë, minatorë, mësues, punëtorë dhe përfaqësues të komuniteteve indigjene kanë dalë në rrugë duke kërkuar dorëheqjen e presidentit konservator, rritje pagash dhe stabilitet ekonomik.
Policia përdori gaz lotsjellës për të shpërndarë protestuesit që tentuan të hynin në sheshin qendror të La Paz-it, ku ndodhen ndërtesat qeveritare. Nga ana tjetër, protestuesit iu kundërpërgjigjën forcave të sigurisë me gurë dhe lëndë shpërthyese artizanale.
Pamjet e publikuara nga qeveria tregojnë protestues që plaçkisin zyra shtetërore dhe largohen me mobilie, kompjuterë dhe pajisje të tjera.
Televizioni bolivian Unitel raportoi se mbi 100 persona janë arrestuar, ndërsa AFP ka konfirmuar të paktën dy protestues të plagosur.
Inflacioni në Bolivi arriti në 14% gjatë muajit prill, ndërsa vendi po përballet me mungesa të mëdha karburanti, ushqimesh dhe ilaçesh.
Presidenti Rodrigo Paz mori pushtetin më pak se gjashtë muaj më parë, pas dy dekadash qeverisjeje socialiste. Një nga vendimet e tij më të debatueshme ishte heqja e subvencioneve të karburantit, masë që synonte të ndalte zbrazjen e rezervave valutore të shtetit, por që ka shkaktuar zemërim të madh popullor.
Situata është tensionuar edhe më tej pasi Prokuroria boliviane lëshoi urdhër arresti për liderin e sindikatës më të madhe të vendit COB, Mario Argollo, me akuza për terrorizëm dhe nxitje të dhunës.
Ndërkohë, mbështetësit e ish-presidentit socialist Evo Morales mbërritën në La Paz pas një marshimi shtatëditor, duke shtuar presionin mbi qeverinë.
Qeveria ka nisur transportimin me avion të ushqimeve drejt kryeqytetit dhe ka paralajmëruar krijimin e një “korridori humanitar” për të furnizuar qytetin, pasi protestuesit kanë bllokuar të paktën 32 akse rrugore në të gjithë vendin.
