Një gjykatë apeli në Paris shpalli fajtorë kompaninë ajrore Air France dhe gjigantin europian të aviacionit Airbus për “vrasje nga pakujdesia” lidhur me rrëzimin tragjik të fluturimit Rio-Paris në vitin 2009, katastrofa më e rëndë ajrore në historinë e Francës.
Gjykata e Apelit në Paris vendosi se të dy kompanitë mbajnë “përgjegjësi të plotë dhe të vetme” për aksidentin që mori jetën e 228 personave në bord. Si Air France ashtu edhe Airbus u dënuan me nga 225 mijë euro gjobë, shuma maksimale e parashikuar për këtë vepër penale ndaj korporatave.
Megjithëse gjobat konsiderohen simbolike për përmasat e kompanive, vendimi përbën një goditje të fortë reputacioni për dy emrat më të mëdhenj të aviacionit europian.
Pas vendimit, Airbus njoftoi menjëherë se do ta ankimojë çështjen në gjykatën më të lartë franceze, duke argumentuar se vendimi bie ndesh me konkluzionet e mëparshme gjyqësore dhe me pafajësinë e shpallur në vitin 2023.
Tragjedia ndodhi më 1 qershor 2009, kur fluturimi AF447 i Air France, që udhëtonte nga Rio de Janeiro drejt Parisit, humbi kontrollin mbi Oqeanin Atlantik dhe u përplas në det. Në bord ndodheshin 216 pasagjerë dhe 12 anëtarë ekuipazhi. Nuk pati asnjë të mbijetuar.
Sipas hetimeve, problemi nisi nga bllokimi me kristale akulli i tubave “pitot”, sensorë që matin shpejtësinë e avionit. Defekti shkaktoi alarm në kabinë dhe çaktivizimin e pilotit automatik.
Ekspertët thanë se pas humbjes së të dhënave të sakta të fluturimit, pilotët e çuan avionin në një ngjitje të gabuar, duke shkaktuar humbjen e fuqisë mbajtëse dhe rrëzimin fatal në oqean.
Gjykata kritikoi Airbus-in për nënvlerësimin e problemeve me sensorët dhe për mungesën e informacionit të duhur ndaj kompanive ajrore dhe ekuipazheve.
Ndërkohë, Air France u shpall fajtore për mungesë të trajnimit specifik të pilotëve për situata emergjente në lartësi të mëdha dhe për mosinformim të mjaftueshëm të ekuipazheve lidhur me rrezikun e ngrirjes së tubave “pitot”.
Gjatë procesit, prokurori Rodolphe Juy-Birmann akuzoi të dy kompanitë për mungesë përgjegjësie morale ndaj familjeve të viktimave.
“Asnjë fjalë e sinqertë ngushëllimi. Gjithçka është mbrojtje e ftohtë korporative. Një fjalë e përmbledh këtë cirk: paturpësi”, deklaroi ai në sallën e gjyqit.
Procesi i apelit zgjati tetë javë dhe u zhvillua nga shtatori deri në dhjetor të vitit të kaluar.
(Burimi: France 24, AFP)
