Ndërsa debati për investimin miliardësh në Sazan dhe Zvërnec po bëhet gjithnjë e më i nxehtë, në rrjetet sociale kanë nisur të qarkullojnë teori nga më të ndryshmet, disa prej tyre duke kaluar kufijtë e debatit politik dhe mjedisor për të hyrë në territorin e gjeopolitikës dhe konspiracionit.
Përveç kritikave mbi ndikimin mjedisor, statusin e pronave apo përfitimet ekonomike të projektit, përdorues të ndryshëm në platforma sociale po hedhin hipoteza se investimi mund të ketë objektiva që shkojnë përtej turizmit luksoz.
Në disa postime që po shpërndahen gjerësisht, vihet theksi te pozicioni strategjik i ishullit të Sazanit në hyrje të Adriatikut, historia e tij si bazë ushtarake dhe përfshirja e investitorëve të lidhur me fondet sovrane të vendeve të Gjirit Persik.
Një prej postimeve më të shpërndara së fundmi pretendon se projekti nuk duhet parë si një resort i zakonshëm turistik, por si një investim me rëndësi më të gjerë strategjike.
Sipas autorit të postimit:
“Ky nuk është një resort luksoz. Sazani është porta detare mes Adriatikut dhe Mesdheut. Ishulli ka 3,600 bunkerë rezistentë ndaj sulmeve bërthamore, 15 kilometra tunele dhe ish-baza për nëndetëse sovjetike. Kush kontrollon ishullin, kontrollon Adriatikun.”
Postimi ndalet më tej te struktura financiare e Affinity Partners, fondi i lidhur me Jared Kushner, dhe te përbërja e ekipit drejtues të kompanisë, ku përmenden ish-zyrtarë të administratës amerikane dhe të sigurisë kombëtare.
“Ky nuk është një resort. Ky është një operacion gjeopolitik i financuar nga shtetet e Gjirit mbi një ish-bazë ushtarake sovjetike në zemër të Europës”, thuhet në përfundim të postimit.
Një prej postimeve thekson këto fakte:
Ky nuk është një resort luksoz.
Sazani – ishulli shqiptar në Ngushticën e Otrantos – është porta detare mes Adriatikut dhe Mesdheut.
3,600 bunkerë rezistentë ndaj sulmeve bërthamore.
15 kilometra tunele.
Ish-stacione ankorimi për nëndetëse sovjetike.
Kush kontrollon ishullin, kontrollon Adriatikun.
Dhe kush po e blen?
Affinity Partners e Jared Kushner.
E financuar në 99 për qind nga Arabia Saudite, Emiratet e Bashkuara Arabe dhe Katari.
157 milionë dollarë tarifa të ardhura nga fondet sovrane të këtyre shteteve.
Kjo konfirmohet nga Komiteti i Financave i Senatit Amerikan nën drejtimin e senatorit Ron Wyden.
Po kush po drejton ekipin?
Asnjë menaxher hotelesh.
Vetëm ish-zyrtarë të inteligjencës dhe ish-anëtarë të administratës Trump.
Gjenerali Miguel Correa – ish-drejtor për çështjet e Gjirit në Këshillin e Sigurisë Kombëtare dhe një nga arkitektët e Marrëveshjeve të Abrahamit.
Kevin Hassett – ish-kryetar i Këshillit të Këshilltarëve Ekonomikë të Shtëpisë së Bardhë.
Chad Mizelle – ish-drejtor i përkohshëm juridik në Departamentin e Sigurisë Kombëtare.
John Rader – ish-zyrtar i Këshillit të Sigurisë Kombëtare.
Nick Butterfield – ish-zëvendës koordinator për politikat në Shtëpinë e Bardhë.
Senatori Wyden ka deklaruar se përfshirja e gjeneralit Correa “ngre shqetësime lidhur me Klauzolën e Emolumenteve të Kushtetutës amerikane”.
Ky nuk është një resort.
Ky është një operacion gjeopolitik – i financuar nga shtetet e Gjirit – mbi një ish-bazë ushtarake sovjetike – në zemër të Europës.
Megjithatë, fakti që diskutimi ka kaluar tashmë nga çështjet e turizmit dhe mjedisit drejt skenarëve gjeopolitikë tregon nivelin e lartë të mosbesimit dhe polemikave që po shoqërojnë një nga investimet më të debatuara të viteve të fundit në Shqipëri.
