Zëdhënësja e Ministrisë së Jashtme të Rusisë, Maria Zakharova, ka vënë në dyshim aftësinë drejtuese të disa liderëve europianë, duke deklaruar se deklaratat që vijnë nga kryeqytete të caktuara të Bashkimit Europian nuk mund të konsiderohen “të shëndosha”.
Në një intervistë për agjencinë shtetërore ruse TASS, në kuadër të Forumit Ekonomik Ndërkombëtar të Shën Petersburgut (SPIEF), Zakharova komentoi zhvillimet politike në Europë dhe raportet me Ukrainën.
E pyetur nëse Ukraina dhe disa vende të tjera europiane mund të konsiderohen “në gjendje vdekjeje cerebrale”, duke iu referuar deklaratës së famshme të Presidentit francez Emmanuel Macron për NATO-n në vitin 2019, ajo u përgjigj:
“Është sigurisht një pyetje interesante.”
Më pas, zyrtarja ruse shtoi:
“Jam plotësisht e bindur se, duke gjykuar nga deklaratat që vijnë nga Bashkimi Europian, ato nuk mund të përshkruhen si të shëndosha. Këto deklarata thjesht nuk janë të shëndosha.”
Komentet e Zakharovës rikthejnë në vëmendje deklaratën e Emmanuel Macron në vitin 2019, kur në një intervistë për revistën The Economist ai tha se NATO po përjetonte një “vdekje cerebrale”, duke argumentuar se aleanca kishte humbur koordinimin strategjik.
Presidenti francez ka mbështetur prej vitesh idenë e forcimit të kapaciteteve mbrojtëse të Bashkimit Europian dhe krijimin e një autonomie më të madhe ushtarake europiane.
Megjithatë, pas nisjes së luftës në Ukrainë në vitin 2022, Macron deklaroi se ofensiva ruse kishte vepruar si një “goditje elektrike” që i kishte dhënë NATO-s një energji të re.
Pavarësisht kësaj, sipas medias franceze L’Express, Macron riktheu sërish kritikat ndaj aleancës në shkurt të vitit 2026, kur kujtoi deklaratën e tij për “vdekjen cerebrale” dhe e krahasoi NATO-n me një “bretkosë me palcë kurrizore”, e aftë të reagojë ndaj stimujve, por pa një qendër të qartë vendimmarrjeje.
Deklaratat e Zakharovës u bënë gjatë Forumit Ekonomik Ndërkombëtar të Shën Petersburgut, i cili u zhvillua nga 3 deri më 6 qershor nën moton “Dialogu pragmatik: rruga drejt një të ardhmeje të qëndrueshme”.
Forumi konsiderohet një nga ngjarjet më të rëndësishme ekonomike të Rusisë dhe zhvillohet në një kohë kur marrëdhëniet mes Moskës dhe vendeve perëndimore vijojnë të mbeten të tensionuara për shkak të luftës në Ukrainë.
