Brazili e ka nisur me një hap fals Kupën e Botës 2026, duke barazuar 1-1 ndaj Marokut në ndeshjen hapëse të Grupit C, të zhvilluar në stadiumin e New Jersey-t.
Afrikanët, gjysmëfinalistë të Botërorit 2022, surprizuan favoritët e mëdhenj të turneut duke dominuar pjesë të konsiderueshme të takimit dhe duke qenë pranë një fitoreje historike.
Maroku kaloi në avantazh në minutën e 21-të. Mesfushori Ismael Saibari përfitoi nga një pasim i shkëlqyer i Brahim Diaz, la pas mbrojtësit brazilianë Marquinhos dhe Gabriel Magalhães dhe mposhti portierin Alisson me një goditje elegante mbi të.
Brazili, që kërkon trofeun e gjashtë botëror pas 24 vitesh pritje, vuajti gjatë pjesës së parë dhe u shpëtua nga ylli i tij më i madh, Vinicius Junior.
Sulmuesi i Real Madrid mori një top nga Bruno Guimarães në minutën e 32-të, depërtoi nga krahu i majtë dhe lëshoi një goditje të fuqishme me të djathtën në cepin e largët të portës, duke barazuar rezultatin në 1-1.
Në pjesën e dytë, Brazili ushtroi më shumë presion. Igor Thiago, Raphinha dhe Danilo patën raste të mira për të shënuar golin e fitores, por portieri maroken Yassine Bounou ishte në një mbrëmje të shkëlqyer.
Megjithatë, edhe Maroku ishte pranë triumfit në minutat e fundit. Neil El Aynaoui detyroi Alissonin të bënte një pritje vendimtare, ndërsa më pas portieri brazilian ndali edhe tentativën e Chemsdine Talbi.
Rezultati lë shije të ndryshme për të dy skuadrat. Për Marokun, një pikë ndaj Brazilit konsiderohet një sukses i madh dhe një sinjal se skuadra afrikane mund të jetë sërish surpriza e turneut. Për Brazilin e trajnerit Carlo Ancelotti, paraqitja tregoi se ka ende shumë punë për t’u bërë nëse synon rikthimin në majën e futbollit botëror.
Në ndeshjen e dytë të grupit, Brazili do të përballet me Haitit, ndërsa Maroku do të luajë ndaj Skocisë.
