Botërori 2026 vijon të dhurojë emocione dhe rekorde. Ndërsa Meksika u bë kombëtarja e parë që siguron matematikisht kualifikimin për në fazën e 1/32-ave, Kanadaja realizoi një nga fitoret më të thella në historinë e Kupës së Botës, duke mposhtur Katarin me rezultatin e thellë 6-0.
Në stadiumin “Guadalajara”, Meksika mposhti 1-0 Korenë e Jugut në ndeshjen e Grupit A. Pjesa e parë ishte e vakët dhe me pak raste për shënim, por gjithçka ndryshoi në minutën e 50-të kur Luis Romo përfitoi nga një gabim i portierit Kim Seung-gyu dhe dërgoi topin në rrjetë. Koreja e Jugut u hodh në sulm në kërkim të barazimit, por portieri Raul Rangel u bë hero për vendasit duke ndalur disa raste të pastra. Me këtë sukses, Meksika siguroi kualifikimin dhe u bë vendi i parë organizator që fiton dy ndeshjet e para pa pësuar gol që nga Franca në Botërorin e vitit 1998.
Ndërkohë, në Grupin B, Kanadaja dhuroi spektakël para tifozëve të saj në “BC Place Stadium”, duke shkatërruar Katarin me rezultatin 6-0. Cyle Larin hapi serinë e golave në minutën e 16-të, ndërsa Jonathan David dyfishoi avantazhin në të 29-ën. Gjithçka u bë edhe më e vështirë për Katarin pas kartonit të kuq të Homam Al-Amin në minutën e 33-të.
Para pushimit, Jonathan David realizoi golin e tretë për kanadezët, ndërsa pjesa e dytë solli edhe më shumë dramë. Mesfushori kanadez Ismael Kone pësoi një dëmtim të rëndë pas një ndërhyrjeje të ashpër, duke i dhënë fund para kohe aventurës së tij në Botëror. I motivuar nga kjo ngjarje, ekipi vendas reagoi fuqishëm. Nathan Saliba shënoi golin e katërt dhe ia dedikoi shokut të skuadrës, ndërsa më pas erdhën një autogol i Mohamed Manai dhe goli i tretë personal i Jonathan David në kohën shtesë.
Me këtë triumf historik, Kanadaja jo vetëm mori kryesimin e Grupit B, por vendosi edhe një rekord të veçantë. Sipas statistikave të Opta, ajo u bë kombëtarja e parë jashtë Evropës dhe Amerikës së Jugut që arrin të shënojë pesë ose më shumë gola në një ndeshje të Kupës së Botës. Gjithashtu, Jonathan David u bë futbollisti i parë që realizon një “hat-trick” në tokën e vendit organizator që nga legjenda angleze Geoff Hurst në vitin 1966.
Pas dy ndeshjeve të para, Meksika dhe Kanadaja konfirmojnë ambiciet e tyre në Botërorin e shtëpisë, duke u kthyer në dy nga surprizat më të këndshme të turneut.
