Një studim i ri ka ngritur shqetësime mbi përdorimin e ëmbëlsuesve artificialë, duke sugjeruar se konsumimi i lartë i disa prej tyre mund të lidhet me një përkeqësim më të shpejtë të kujtesës dhe aftësive njohëse me kalimin e viteve.
Studimi, i publikuar në revistën shkencore Neurology të Akademisë Amerikane të Neurologjisë, ndoqi për rreth tetë vjet 12.772 të rritur në Brazil, duke analizuar dietën e tyre dhe performancën në teste të kujtesës, të folurit dhe përpunimit të informacionit.
Rezultatet treguan se personat që konsumonin sasinë më të madhe të ëmbëlsuesve artificialë kishin një ritëm 62% më të shpejtë të rënies së funksioneve njohëse krahasuar me ata që konsumonin më pak. Sipas studiuesve, ky ndryshim është i krahasueshëm me rreth 1.6 vite shtesë plakjeje të trurit. Edhe ata me konsum mesatar shfaqën një rënie më të shpejtë, rreth 35% më shumë se grupi me konsumin më të ulët.
Gjatë studimit u analizuan shtatë ëmbëlsues të përdorur gjerësisht: aspartami, sakarina, Acesulfame K, eritritoli, xylitoli, sorbitoli dhe tagatoza. Studiuesit konstatuan se gjashtë prej tyre – aspartami, sakarina, Acesulfame K, eritritoli, sorbitoli dhe xylitoli – u shoqëruan me një rënie më të shpejtë të kujtesës dhe funksioneve të tjera njohëse. Vetëm tagatoza nuk rezultoi të kishte një lidhje të tillë.
Lidhja mes konsumit të lartë të ëmbëlsuesve dhe rënies së aftësive njohëse ishte më e theksuar tek personat nën moshën 60 vjeç dhe tek ata me diabet, të cilët zakonisht përdorin më shpesh zëvendësues të sheqerit. Tek pjesëmarrësit mbi 60 vjeç, studiuesit nuk vunë re të njëjtën lidhje të fortë.
Megjithatë, autorët theksojnë se studimi është vëzhgues dhe nuk provon se ëmbëlsuesit artificialë janë shkaku i drejtpërdrejtë i dëmtimit të kujtesës. Ai tregon vetëm një lidhje statistikore mes konsumit të tyre dhe përkeqësimit të funksioneve njohëse. Për më tepër, të dhënat për dietën janë bazuar në deklarimet e vetë pjesëmarrësve, çka mund të ndikojë në saktësinë e rezultateve.
“Ëmbëlsuesit pa ose me pak kalori shpesh konsiderohen një alternativë më e shëndetshme ndaj sheqerit. Megjithatë, gjetjet tona sugjerojnë se disa prej tyre mund të kenë efekte negative në shëndetin e trurit me kalimin e kohës“, tha autorja kryesore e studimit, Dr. Claudia Kimie Suemoto, nga Universiteti i São Paulos.
Ajo shtoi se nevojiten kërkime të tjera për të konfirmuar këto rezultate dhe për të kuptuar më mirë nëse alternativa të tjera natyrale ndaj sheqerit, si mjalti, shurupi i panjës apo pureja e mollës, mund të përbëjnë zgjedhje më të sigurta për shëndetin afatgjatë të trurit.
