Zjarret masive që po përfshijnë Francën jugperëndimore nuk po shkaktojnë vetëm dëme mjedisore dhe sociale, por edhe pasoja të rënda ekonomike. Ministri francez i Ekonomisë, Roland Lescure, deklaroi se ndikimi i tyre mbi ekonominë ka qenë “si një rrufe”, ndërsa mijëra biznese janë detyruar të ndërpresin aktivitetin.
Pas një mbledhjeje emergjente me përfaqësues të biznesit, Lescure tha se më shumë se 13 mijë biznese janë evakuuar në departamentin Gironde, një nga zonat më të prekura nga flakët.
Qeveria franceze njoftoi se kompanitë që kanë pësuar dëme direkte ose janë prekur nga ndërprerja e aktivitetit ekonomik do të përfitojnë nga skema shtetërore e pagesës së pjesshme të punësimit, ndërsa banorëve të evakuuar do t’u mbulohen nga kompanitë e sigurimit shpenzimet e akomodimit të përkohshëm deri në tre javë, edhe nëse banesat e tyre nuk janë dëmtuar.
Ndërkohë, presidenti Emmanuel Macron zhvilloi një mbledhje të jashtëzakonshme të krizës me ministrat përgjegjës për të koordinuar reagimin ndaj situatës.
Zjarri që shpërtheu të mërkurën në zonën e Saumos, në departamentin Gironde, ka djegur tashmë rreth 42 mijë hektarë tokë dhe ka detyruar 220 mijë persona të largohen nga shtëpitë e tyre.
Sipas autoriteteve, të paktën 84 zjarrfikës janë plagosur gjatë operacioneve për shuarjen e flakëve.
Vatra të tjera aktive vazhdojnë të digjen edhe në departamentet Haute-Corse, Var, Hautes-Alpes dhe Landes, ndërsa autoritetet franceze paralajmërojnë se situata mbetet kritike.
