Drejtoresha Ekzekutive e kompanisë kombëtare hekurudhore gjermane Deutsche Bahn (DB), Evelyn Palla, ka pranuar se një nga arsyet kryesore të krizës së vazhdueshme të transportit hekurudhor në Gjermani ka qenë ajo që e cilëson si një “kulturë e papërgjegjshmërisë së organizuar” brenda kompanisë.
Në një intervistë për gazetën Welt am Sonntag, Palla shpjegoi se për vite me radhë vendimet më të rëndësishme operative merreshin nga drejtuesit në selinë qendrore, ndërsa përgjegjësia për zbatimin e tyre u lihej punonjësve në terren.
Sipas saj, kjo krijonte një situatë paradoksale: punonjësit në terren ankoheshin se nuk kishin marrë pjesë në vendimmarrje dhe se vendimet nuk funksiononin në praktikë, ndërsa drejtuesit në qendër deklaronin se nuk kishin përgjegjësi për mënyrën se si ato zbatoheshin.
“Në fund, askush nuk mbante përgjegjësi. Ishte një lloj papërgjegjshmërie e organizuar,” u shpreh ajo.
Palla, e cila mori drejtimin e Deutsche Bahn në tetor të vitit të kaluar, tha se tashmë kompania ka nisur një proces të thellë reformash. Janë thjeshtuar procedurat, janë reduktuar nivelet burokratike dhe po u jepet më shumë autonomi njësive lokale për të marrë vendime dhe për të mbajtur përgjegjësi për rezultatet.
Megjithatë, ajo paralajmëroi se ndryshimet nuk do të japin efekt të menjëhershëm. Sipas saj, rrjeti hekurudhor gjerman është dëmtuar nga 25 vite politikash kursimi dhe mungesë investimesh, ndaj rikthimi i standardeve të larta kërkon kohë.
Palla shprehu bindjen se transformimi i Deutsche Bahn do të jetë një proces afatgjatë, duke shtuar se objektivi është që deri në vitin 2035, kur kompania të festojë 200-vjetorin e saj, pjesa më e vështirë e reformimit të ketë përfunduar.
Burimi: DW
