Bashkia më e madhe e vendit, aty ku është ngjeshur e gjithë Shqipëria, duke “shqyer” territorin e saj, funksionon si mos më keq. Për inerci në kryeqytetin e Shqipërisë kryhen disa shërbime, por asgjë nuk funksionon dhe çdo ditë që kalon cilësia e jetesës në Tiranë po degradon.
Me kryetarin e bashkisë të izoluar në burg që prej shkurtit 2025, bashkia e kryeqytetit ka një drejtim administrativ me 4 zëvendëskryetarë ku njëri luan rolin e kryetarit “në mungesë dhe me urdhër” dhe tre të tjerët mbulojnë sektorë të caktuar shërbimesh.
Me futjen e Erion Veliajt në burg, i cili është dhe nuk është kryetar bashkie njëkohësisht, në këmbë të tij me vulë dhe firmë u vendos Anuela Ristani, një personazh me një ekuilibër psikik të brishtë (kjo u pa live në një emision investigativ) pa asnjë vlerë në drejtimin administrativ.
Tre zëvendëskryetarët e tjerë janë ndërruar dy herë, sipas ekuilibrit të pushtetit brenda PS. Sot zërat brenda korridoreve të partisë në pushtet tregojnë me drojë se ata komandohen nga “klani” i Belinda Ballukut, e cila me ikjen nga froni qeveritar kërkon të mbajë fijet e pushtetit rreth vetes.
Pozicioni më kyç i bashkisë pa kryetar efektiv është ai i Sekretarit të Përgjithshëm.
Në këtë post është vendosur në maj 2025 Eldi Hoxha, një personazh i përfolur mediatikisht dhe me shumë dritëhije në karrierën e tij, që fillon në Vlorë nga e ka edhe origjinën dhe përfundon në Tiranë.
Eldi Hoxha, raportohet se është një nga pjesëmarrësit e grupit të “Çunave problematikë” të “tërmetit të Gjiknurit” në dosjen 184 në Dibër.
Si një nga dosjet më të bujshme të drejtësisë, Dosja 184 e Dibrës, e ka gjenezën në vitin 2016, kohë që përkon me kohën kur në Gjykatën e Dibrës ka ushtruar detyrën si pjesë e kësaj gjykate, magjistratja Gilda Hoxha (Llambraj).Gjyqtarja Gilda Hoxha është bashkëshortja e Eldi Hoxhës, detaj i rëndësishëm që nuk është përmendur asnjëherë, kur emri i bashkëshortit të saj u lakua si i përzier me grupin e “problematikëve” të përfshirë në shitblerjen e votave në zgjedhjet e pjesshme lokale të vitit 2016 në Bashkinë e Dibrës.
Nuk ka raportime që kjo gjyqtare ka qenë pjesë e gjykimit të kësaj dosjeje, por fakti që ajo ishte kolege e pesë apo gjashtë gjyqtarëve të kësaj gjykate të vogël në ato vite, ngre pikëpyetje të mëdha nëse ka një bazë reale lidhja me “klanin” e Dibrës, karriera e lakmuar e bashkëshortit të saj më pas, por edhe e saja.
Znj. Hoxha, kaloi vettingun më 24 nëntor 2023, megjithëse kishte probleme me një apartament “të blerë nga bashkëshorti para martesës dhe përpara fillimit të detyrës”.
Magjistratja u “pastrua” në mënyrë unanime nga trupa e KPK-së e kryesuar nga Lulzim Hamitaj, me relatore Burnilda Bekteshin dhe anëtare Etleda Çiftjan.
Ajo më pas u promovua si gjyqtare e Gjykatës së Apelit, gjykatë në të cilën ushtron detyrën edhe sot.
SPAK e ka akuzuar dhe marrë të pandehur bashkëshortin e gjyqtares, Eldi Hoxhën, më 28 maj 2025 për vepra penale që lidhen kontrabandën dhe shpërdorimin e detyrës, si pjesë e një Grupi të Strukturuar Kriminal, duke i caktuar dy masa sigurie, “Ndalimi i daljes jashtë shtetit” dhe “Detyrimi për t’u paraqitur në Policinë Gjyqësore” dy herë në muaj.
Eldi Hoxha ka qenë Drejtor i Departamentit Operativ-Hetimor në Drejtorinë e Përgjithshme të Doganave, një pozicion tejet i rëndësishëm ky, nga viti 2020 deri në 2025.
Në dosjen e Prokurorisë së Posaçme ku përmenden 36 persona, mes të cilëve emra me peshë si Ergys Agasi, Darjo Jashari (dhëndri i biznesmenit Shefqet Kastrati), bën pjesë edhe z. Hoxha. Të gjithë dyshohet se kanë krijuar një skemë të sofistikuar të kontrabandimit të cigareve të prodhuara brenda territorit të Shqipërisë për në vendet fqinje e më pas ato të BE-së, duke i shkaktuar buxhetit të shtetit miliona euro dëme.
Bashkia e Tiranës e kthyer tashmë në një “paraburgim” të vogël, ka dy pozicionet kyçe, kryetarin dhe Sekretarin e Përgjithshëm të saj në duart e SPAK. Të dy administrojnë punët e shumta të Tiranës, duke patur mendjen te çështjet që nuk kanë të bëjnë me të, por me ata vetë.
Ndërkohë, administrata e superfryrë e Bashkisë Tiranë, vijon punën për menaxhimin e përditshëm të kryeqytetit të Shqipërisë, si një “çikllop” i qërruar, i cili prek “delet” me hamendësim çdo mëngjes.
© Ky është artikull ekskluziv i KontrasT.al, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to” / Artikulli mund të ripublikohet vetёm i shoqëruar me linkun e artikullit origjinal.
