Erion Veliaj nuk humbet asnjë ditë kohe. S’pastron klanin Balluku me një të rënë të lapsit. Shkarkon me “dorëheqje” kryetaren e komanduar të bashkisë dhe Sekretarin e Përgjithshëm.
Zëra nga brenda bashkisë së kryeqytetit raportojnë se në ditët e fundjavës ai ka kërkuar dorëheqjet e menjëhershme të dy pikave kyçe të “Ballukut”, Anuela Ristanit dhe Eldi Hoxhës, nëse ato nuk donin të shkarkoheshin me ceremoni.
Nëse Anuela Ristani e firmosi menjëherë letrën e saj të dorëheqjes, pasi kuptoi që kryeministri Rama tashmë kishte ndërruar qëndrim dhe ishte bërë kryekëput aleat me Veliajn, Eldi Hoxha “rezistoi” deri të hënën në mbrëmje duke kërkuar konsultime me negociatorë të klanit Balluku dhe të gruas së tij, gjyqtares së Gjykatës së Apelit, Gilda Hoxha.
Sekretari i Përgjithshëm Hoxha, dorëzoi dorëheqjen në mëngjesin e 1 shtatorit, pasi kuptoi se Erion Veliaj ishte gati të bënte një goditje më të madhe se sa thjesht shkarkimin e tij.
Në Bashkinë e Tiranës rikthehet në postin e mëparshëm të drejtorit juridik besniku i Erion Veliajt, Alban Dokushi. Nëse këtë pozicion Dokushi e rifitoi me një vendim gjykate të formës së prerë që e ekzekutoi me përmbarim, “promovimin” e tij si Sekretar i Përgjithshëm e bëri brenda ditës Erion Veliaj.
Veliaj e komandon brenda tre orësh nga marrja e dorëheqjes së Eldi Hoxhës, Alban Dokushin si Sekretar të Përgjithshëm të Bashkisë Tiranë.
Tashmë Dokushi mban dy poste kyçe në Bashki në këmbë dhe “firmë” të Erion Veliajt, duke filluar që ditën e sotme operacionin “Haka te i zoti”.
Një linjë e tërë drejtuesish që vepronin nën urdhrat e klanit “Balluku”, “Manja” ose “Xhafa” po bëhen gati të shkarkohen ose dorëhiqen, ndër të parët janë drejtorët Erion Çaka, Daniel Demiri, Berta Piro, por në këtë furtunë raportohet se mund të përfshihet edhe një nga nënkryetarët e Bashkisë Ilir Mengra.
Ilir Mengra, Anuela Ristani dhe një grup sekserësh me në krye bashkëshortin e Ristanit, Bledi Çikopana, “akuzohen” nga Veliaj se kanë minuar qëllimisht gjithë aktivitetin e Bashkisë Tiranë, duke krijuar një “shtab” korruptiv brenda saj.
Është për t’u habitur se si Erjon Veliaj nga brenda qelive të IEVP Durrës, ka marrë informacion të detajuar dhe “vëzhguar” të gjithë stafin e Bashkisë për një kohë të gjatë deri sa arriti në “shpërthimin” e fundjavës së fundit të muajit gusht.
Është pak ironike se si kryetari i Bashkisë së akuzuar dhe paraburgosur për “korrupsion”, akuzon vartësit e tij në liri për të njëjtën vepër penale.
IEVP Durrës është kthyer ditën e sotme, de facto në një zyrë bashkie. Dhe jo zyrë e zakonshme, por e bashkisë së kryeqytetit të Shqipërisë. Veliaj ka firmosur me dhjetëra shkresa dhe urdhra të lëna “pending” nga Anuela Ristani, e cila nga zërat brenda bashkisë raportojnë se “tentoi deri në sekondën e fundit të ndalonte cunamin që po vinte”.
Veliaj ka nënshkruar nga burgu përveç shumë akteve edhe pagat e punonjësve të Bashkisë Tiranë që Ristani i kishte lënë qëllimisht pa firmë deri të premten e datës 28 gusht kur ajo ishte në detyrë dhe shpresonte se e shtuna me të dielën do ta “shpëtonin”.
Ndër lëvizjet e ditës së sotme Veliaj ka komanduar Vasilika Vjeron si “kryetare” e Bashkisë Tiranë, por që kompetencat kryesore tashmë ai i ka mbajtur vetë.
Kjo lëvizje tregon se “i burgosuri” Veliaj nuk ka më besim tek askush përveç se tek firma e tij, sa kohë që nuk ndodhet jashtë qelive të paraburgimit të Durrësit. Shpresa se ai mund rifitojë lirinë e përkohshme dhe të kthehet në zyrën te sheshi Skënderbej, mbetet e vakët, por optimizmi për një rikthim në “shtëpi” nga ku mund të drejtojë më komod se nga burgu është një opsion i mundshëm, që pritet të marrë firmën e Gjykatës së Lartë në datë 15 shtator.
© Ky është artikull ekskluziv i KontrasT.al, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to” / Artikulli mund të ripublikohet vetёm i shoqëruar me linkun e artikullit origjinal.
