Sistemi i ri elektronik i kontrollit të kufijve të Bashkimit Europian po shkakton probleme serioze për udhëtarët në aeroporte, me numrin e pasagjerëve që humbasin fluturimet lidhëse të dyfishuar gjatë verës, sipas të dhënave të industrisë ajrore.
Situata rezulton edhe më problematike për disa kompani ajrore, të cilat kanë raportuar një rritje deri në gjashtë herë të numrit të udhëtarëve që nuk kanë arritur në kohë për fluturimin e radhës.
Problemet janë shfaqur pas vendosjes së sistemit elektronik të kontrollit kufitar të BE-së, i cili është kritikuar për vonesat që po krijon gjatë përpunimit të pasagjerëve.
Procedurat e reja “smart” synojnë të digjitalizojnë kontrollet në kufijtë e jashtëm europianë, por gjatë muajve të verës, kur aeroportet përballen edhe me fluksin më të madh të udhëtarëve, zbatimi i tyre ka sjellë pritje më të gjata dhe vështirësi për pasagjerët që duhet të kalojnë kontrollin kufitar përpara se të vazhdojnë drejt një fluturimi tjetër.
Pasojat janë veçanërisht të ndjeshme në aeroportet e mëdha europiane, ku një vonesë në kontrollin e pasaportave mund të bëjë që udhëtarët me kohë të kufizuar tranziti të mos arrijnë në portën e nisjes për fluturimin pasues.
Të dhënat shtojnë presionin mbi sistemin e ri kufitar europian, i cili ishte projektuar për të modernizuar dhe forcuar kontrollet, por po përballet me kritika për ndikimin që procedurat e reja kanë mbi shpejtësinë e lëvizjes së pasagjerëve.
Problemet e regjistruara gjatë sezonit veror pritet të shtojnë kërkesat e kompanive ajrore që autoritetet europiane të përmirësojnë funksionimin e sistemit dhe të reduktojnë kohën e nevojshme për kontrollet kufitare.
