Pesë vende të Bashkimit Europian po avancojnë një plan për të dërguar jashtë territorit të BE-së emigrantët të cilëve u është refuzuar kërkesa për azil, duke synuar krijimin e të ashtuquajturave “qendra kthimi” që mund të bëhen funksionale gjatë vitit 2027.
Danimarka, Greqia, Austria, Gjermania dhe Holanda kanë rënë dakord të punojnë së bashku për nismën dhe po zhvillojnë bisedime për të gjetur një ose disa vende të treta që do të pranonin personat pa të drejtë ligjore qëndrimi në BE.
Ministri danez i Migracionit, Morten Bodskov, tha se rreth Vitit të Ri pritet të arrihet një mirëkuptim i përbashkët me një vend partner jashtë Unionit, pa bërë të ditur se për cilin shtet bëhet fjalë. Uganda dhe Ruanda përmenden si mundësi, ndërsa kjo e fundit konfirmoi në gusht se kishte nisur bisedime paraprake me disa vende europiane.
Ministri grek i Migracionit dhe Azilit, Thanos Plevris, tha se negociatat ndodhen në një fazë “të avancuar” dhe se objektivi është që qendra e kthimit në një vend jashtë BE-së të jetë funksionale në vitin 2027.
Nisma vjen pas miratimit në qershor nga Parlamenti Europian të rregullave më të ashpra për emigracionin, të cilat u japin autoriteteve kompetenca më të gjera për ndalimin e emigrantëve dhe krijojnë mundësinë për ngritjen e “qendrave të kthimit” jashtë BE-së.
Pesë vendet argumentojnë se modeli do të ndihmojë në kthimin e personave që nuk kanë më të drejtë të qëndrojnë në Europë, por që aktualisht nuk mund të dërgohen në vendet e tyre të origjinës. Sipas tyre, ai mund të godasë gjithashtu biznesin e trafikantëve që përfitojnë nga udhëtimet e rrezikshme të emigrantëve drejt Europës.
Plani, megjithatë, ka shkaktuar kundërshtime të forta nga organizatat e të drejtave të njeriut dhe nuk mbështetet nga të gjitha vendet e BE-së. Presidenti francez Emmanuel Macron e ka cilësuar idenë joefektive dhe të papajtueshme me vlerat europiane.
Në këtë debat është përmendur edhe Shqipëria, ku qendrat e ngritura dhe të administruara nga Italia për përpunimin e emigrantëve janë përballur me sfida ligjore. Ndërkohë, Britania e Madhe hoqi dorë nga skema e saj për dërgimin e emigrantëve të parregullt në Ruandë.
Burimi: AFP/France 24
