Rusia dhe Koreja e Veriut kanë hapur urën e parë rrugore që lidh drejtpërdrejt dy vendet, një projekt që pritet të lehtësojë ndjeshëm transportin e mallrave dhe njerëzve, por që po ngre shqetësime se mund të shërbejë edhe si një korridor i ri logjistik për luftën e Rusisë në Ukrainë.
Ura rreth një kilometër e gjatë kalon mbi lumin Tumen dhe lidh qytetin verikorean Rason me Khasanin në Rusi. Sipas agjencisë shtetërore ruse TASS, nëpër të mund të kalojnë deri në 300 automjete dhe 2,323 persona në ditë.
Pheniani deklaroi se infrastruktura e re do të përdoret për “shkëmbime njerëzore, turizëm dhe tregti”, ndërsa kryeministri rus Mikhail Mishustin e cilësoi atë një “simbol të ri të miqësisë”, duke thënë se marrëdhëniet mes Moskës dhe Phenianit ndodhen në një nivel të paprecedentë.
Fillimisht ura do të përdoret për transportin e mallrave dhe më vonë gjatë këtij viti pritet të hapet edhe për trafikun e pasagjerëve. Deri tani, dy vendet kishin lidhje ajrore dhe hekurudhore, por nuk ekzistonte një urë e mirëfilltë rrugore.
Megjithatë, infrastruktura e re po shihet edhe në kontekstin e bashkëpunimit gjithnjë e më të ngushtë ushtarak mes Rusisë dhe Koresë së Veriut. Organizata ukrainase Truth Hounds pretendon se ura mund të përdoret kryesisht si një korridor logjistik për transportimin e personelit ushtarak, punëtorëve dhe materialeve nga Koreja e Veriut drejt Rusisë, ndërsa në drejtimin tjetër mund të lëvizin teknologji dhe burime ruse.
Sipas vlerësimeve të shërbimeve të inteligjencës së Koresë së Jugut të cituara nga BBC, Pheniani i ka transferuar tashmë Rusisë raketa, predha artilerie dhe armë me një vlerë të përllogaritur prej 7 deri në 14 miliardë dollarësh, ndërsa rreth 11 mijë trupa koreano-veriore vlerësohet se janë përfshirë në luftimet kundër Ukrainës në territorin rus.
Ndërtimi i urës nisi në vitin 2025, pas marrëveshjes së arritur gjatë vizitës së Vladimir Putinit në Korenë e Veriut një vit më parë, kur dy vendet nënshkruan edhe traktatin e partneritetit strategjik që parashikon ndihmë reciproke në rast agresioni.
Burimi: BBC
