Bashkimi Europian ka prezantuar një plan të ri “Buy European”, i cili synon të nxisë institucionet dhe autoritetet publike që paratë e taksapaguesve t’i shpenzojnë më shumë për mallra dhe shërbime të prodhuara në Europë, në një përpjekje për të mbrojtur kompanitë europiane përballë konkurrencës së fortë, veçanërisht nga Kina.
Komisioni Europian propozoi të mërkurën një reformë të gjerë të rregullave të prokurimit publik, që përfshin blerjet e administratës, shkollave, spitaleve dhe institucioneve të tjera publike. Megjithatë, nuk do të vendosen kuota të detyrueshme për produktet “Made in Europe”.
Ndryshimi kryesor është se autoritetet publike nuk do të orientohen thjesht drejt ofertës më të lirë. Në tenderë do të duhet t’i kushtohet më shumë rëndësi cilësisë, qëndrueshmërisë mjedisore, zinxhirëve lokalë të furnizimit dhe kushteve të punës. Sipas propozimit, cilësia duhet të ketë një peshë minimale prej 30% në kriteret e vlerësimit, ndërsa për kontratat me intensitet të lartë pune kjo peshë do të arrijë të paktën 50%.
Prokurimet publike përfaqësojnë rreth 15% të Prodhimit të Brendshëm Bruto të BE-së, ose afro 2.6 trilionë euro në vit, ndaj Brukseli synon ta përdorë këtë fuqi të madhe blerëse për të mbështetur industrinë europiane.
Komisioneri europian për politikën industriale, Stéphane Séjourné, tha se rregullat e reja do t’u japin autoriteteve më shumë siguri ligjore për t’u dhënë përparësi ofertave europiane dhe, në raste të caktuara, për të kufizuar ose refuzuar ofertat nga vende që nuk kanë marrëveshje reciproke me BE-në për prokurimet publike.
Në qendër të shqetësimit është veçanërisht Kina, kompanitë e së cilës akuzohen në Bruksel se në disa sektorë përfitojnë nga subvencionet shtetërore dhe mund të ofrojnë çmime me të cilat prodhuesit europianë e kanë të vështirë të konkurrojnë. Kina kontinentale, ndryshe nga BE-ja, SHBA-ja, Britania, Kanadaja dhe Japonia, nuk është palë në Marrëveshjen e Organizatës Botërore të Tregtisë për Prokurimet Qeveritare.
Me pak fjalë, filozofia e reformës përmblidhet duke thënë se, nëse një autoritet publik zgjedh autobusë kinezë në vend të atyre europianë, kjo nuk duhet të justifikohet më me rregullat e BE-së, por të konsiderohet një zgjedhje e vetë autoritetit që zhvillon tenderin.
Propozimi duhet ende të miratohet nga Parlamenti Europian dhe vendet anëtare dhe mund të pësojë ndryshime gjatë procesit legjislativ.
Burimi: The Guardian
