Finlanda ka përfunduar ndërtimin e një gardhi sigurie 200 kilometra të gjatë përgjatë kufirit me Rusinë, duke forcuar kështu kufirin më të gjatë të NATO-s me këtë vend, në një kohë kur Helsinki shpreh shqetësim për aktivitetet hibride ruse dhe përdorimin e mundshëm të emigracionit si mjet presioni.
Projekti nisi pasi pushtimi rus i Ukrainës ndryshoi rrënjësisht situatën e sigurisë së Finlandës dhe e shtyu vendin të braktiste dekada të tëra neutraliteti ushtarak për t’u anëtarësuar në NATO në prill 2023. Në fund të atij viti, më shumë se 1,300 emigrantë pa viza mbërritën në kufirin lindor, ndërsa Helsinki akuzoi Moskën se po organizonte lëvizjen e shtetasve të vendeve të treta drejt kufirit si formë të “luftës hibride”. Kremlini i ka mohuar këto akuza.
Gardhi është 4.5 metra i lartë, i pajisur me kamera dhe sensorë dhe mbulon 200 kilometra nga gjithsej 1,340 kilometra kufi që Finlanda ndan me Rusinë. Pjesa më e madhe e tij është përqendruar në juglindje të vendit.
Kostoja e ndërtimit ka arritur në 356 milionë euro, ndërsa mirëmbajtja pritet të kushtojë 2–3 milionë euro në vit. Autoritetet finlandeze thonë se, pavarësisht zhvillimit të shpejtë të teknologjisë së dronëve, një barrierë fizike vazhdon të konsiderohet zgjidhja më e mirë për kontrollin e lëvizjeve masive në kufi.
“Sot është qetësi, por situata mbetet e tensionuar dhe vërtet nuk dimë çfarë do të ndodhë nesër. Gjithçka mund të ndryshojë shumë shpejt dhe kjo është arsyeja pse duhet të jemi shumë të përgatitur”, deklaroi ministrja e Brendshme finlandeze, Mari Rantanen.
Finlanda e ka mbajtur kufirin tokësor me Rusinë të mbyllur pothuajse pa ndërprerje që prej fundit të vitit 2023, ndërsa qeveria ka propozuar zgjatjen deri në fund të vitit 2028 të ligjit që, në rrethana të jashtëzakonshme, lejon kufizimin e pranimit të kërkesave për azil në zona të caktuara kufitare kur konsiderohet se rrezikohet sovraniteti ose siguria kombëtare. Ky legjislacion ka shkaktuar debat, pasi ekspertë ligjorë kanë paralajmëruar për përplasje të mundshme me detyrimet ndërkombëtare për të drejtat e njeriut dhe të drejtën e BE-së.
