Zvarritja e vendimeve gjyqësore duket se nuk është një problem vetëm shqiptar. Një debat i ngjashëm është hapur edhe në Gjykatën Supreme të Shteteve të Bashkuara, ku një prej gjyqtarëve më të njohur, Samuel Alito, ka kritikuar kohën e gjatë që iu desh Gjykatës për të marrë dhe publikuar një vendim që lidhej me zgjedhjet.
Çështja kishte të bënte me rregullat për votimin me postë në zgjedhjet e mesmandatit të vitit 2026. Administrata e Presidentit Donald Trump kërkonte zbatimin e disa rregullave të reja për mënyrën se si do të përpunoheshin dhe gjurmoheshin fletët e votimit të dërguara me postë.
Por çështja përfundoi në gjykata dhe zbatimi i rregullave u bllokua.
Gjykata Supreme vendosi përfundimisht të mos lejonte zbatimin e tyre për zgjedhjet e kësaj vjeshte, pasi koha e mbetur ishte shumë e shkurtër për ndryshimin e procedurave. Dy gjyqtarë, Samuel Alito dhe Clarence Thomas, ishin kundër këtij vendimi.
Alito shkruan se një pjesë e përgjegjësisë për faktin që çështja arriti kaq pranë zgjedhjeve u takon vetë gjykatave, përfshirë Gjykatën Supreme. Sipas tij, qeverisë iu desh të priste pothuajse një muaj që Gjykata të përfundonte zbaardhjen e vendimit tё mëparshëm.
Gjatë kësaj kohe, gjyqtarët kishin përgatitur rreth 40 faqe arsyetime dhe kundërshtime, ndërsa administrata kishte paralajmëruar se vendimi duhej marrë shpejt, në mënyrë që rregullat e reja të mund të zbatoheshin përpara zgjedhjeve.
Kur vendimi ishte zbardhur, koha praktikisht kishte mbaruar.
Kjo ka bërë që nё mediat konservatore si The Federalist të ngrihet një dyshim edhe më i fortë: a e zvarritën qëllimisht disa gjyqtarë publikimin e kundërshtimeve të tyre, derisa të bëhej tepër vonë për zbatimin e rregullave të Trump?
Gjithsesi, as Alito vetё nuk thotë shprehimisht se kolegët e tij e vonuan qëllimisht vendimin për arsye politike. Ai evidenton vonesën dhe faktin se edhe Gjykata Supreme mban një pjesë të përgjegjësisë për kohën e humbur.
Burimi: The Federalist
