Shefi i Forcave të Armatosura të Gjermanisë, gjenerali Carsten Breuer, është zgjedhur kryetari i ardhshëm i Komitetit Ushtarak të NATO-s, organi më i lartë ushtarak i Aleancës.
Breuer do të marrë detyrën në korrik 2027, duke pasuar admiralin Giuseppe Cavo Dragone, i cili drejton Komitetin që prej janarit 2025.
“Gjykimi juaj operacional, njohja e thellë e Aleancës dhe drejtimi i Forcave të Armatosura gjermane do t’i shërbejnë mirë NATO-s”, deklaroi Cavo Dragone, duke njoftuar zgjedhjen e gjeneralit gjerman.
Sipas tij, shefat e mbrojtjes të vendeve të NATO-s i kanë dhënë Breuerit besimin e tyre “në një moment sfidues për sigurinë euroatlantike”.
Zgjedhja vjen në një periudhë kur Gjermania po rrit ndjeshëm rolin e saj në mbrojtjen europiane, ndërsa brenda NATO-s po zhvillohet procesi për rritjen e shpenzimeve dhe kapaciteteve ushtarake të vendeve europiane dhe marrjen prej tyre të një përgjegjësie më të madhe për mbrojtjen konvencionale të kontinentit.
Komiteti Ushtarak është autoriteti më i lartë ushtarak i NATO-s dhe u jep këshilla ushtarake organeve politike vendimmarrëse të Aleancës. Kryetari i tij është zyrtari më i lartë ushtarak i NATO-s dhe këshilltari kryesor ushtarak i Sekretarit të Përgjithshëm.
Breuer do të qëndrojë në detyrën e tij aktuale në Bundeswehr deri në kalimin zyrtar të drejtimit të Komitetit në korrik të vitit të ardhshëm.
