Mbrëmja e 3 tetorit në rrugën e Dibrës në Tiranë gëlonte nga lëvizjet e të shtunës. Njerëz nëpër trotuarё, makina, autobusë, biçikleta dhe taksi në korsitë e tyre lëviznin pa pushim në një nga akset rrugore më të dendura të Tiranës.
Shtëpia e funeraleve “Alba 2000” në buzë të rrugës së Dibrës, vetëm 200 metra larg Medresesë, u bë “dëshmitare” e një vrasjeje, viktimën e të cilës do ta strehonte vetëm një ditë më pas.
Shpëtime Muça, 75 vjeç, nënë e dy fëmijëve (djalë, vajzë) doli rreth orës 19:30 nga banesa e saj, vetëm pak metra larg “bujtinës” së vdekjes. Ajo kishte nevojë të merrte ilaçe në farmacinë pranë shtëpisë dhe, për këtë duhet të kalonte vetëm pak metra rrugën e Dibrës nga njëra anë në tjetrën.
Dy motorë me shpejtësi vrastare (80-100 km/orë) po bënin gara në rrugën e mbushur me trafik, në segmentin ku tabela lejon vetëm 30 km/orë. Dy djem të rinj rreth të njëzetave, pa skafandra, njëri i identifikuar si Eri Markaj, garonin në rrugën e ngushtë me dy motorra, pa u shqetësuar aspak nga trafiku, policia, semafori vetëm disa metra larg “Alba 2000”.
Në parakalim garues të makinave të cilat ecnin në rreshtin e rënduar me trafik, para një semafori, motorristët u përplasën me njëri-tjetrin dhe goditën edhe Shpëtime Muçën, viktimën e radhës në rrugët e përgjakura të Shqipërisë të mbushura me “aksidente” vrastare.
Policia bllokoi rrugën për të “këqyrur” vendin e ngjarjes, duke arrestuar në spital njërin prej dy motorristëve. Policia sipas banorëve të zonës nuk mori asnjë dëshmi apo kamera sigurie që tregojnë çmendurinë e garave me motor në mes të mbrëmjes nga të rinjtë që nuk pyesin për askënd.
Në pranga u vendos Eri Markaj, 20 vjeç, njëri prej motorristëve por nuk flitet për “bashkëpunëtorin” e tij. Ngjarja në komunikatë zyrtare u trajtua si aksident kur në fakt është “vrasje” në gara ilegale me motorra në mes të Tiranës.
Shpëtime Muça u transportua në spital, ku ndërroi jetë disa orë më pas. Ajo u nis për të blerë ilaçe për shëndetin, por gjeti recetën e vdekjes mu përpara shtëpisë që po e përcjell sot për në botën tjetër, “Alba 2000”.
Edhe sa viktima të tjera si Shpëtime Muça do mbulohen me çarçaf të bardhë në rrugët e Shqipërisë?
