Universitetet në të gjithë vendin hapin sot dyert për nisjen e vitit të ri akademik 2026-2027. Mijëra studentë rikthehen në auditore, ndërsa për ata që ulen për herë të parë në bankat e universitetit nis një etapë e re.
Sipas kalendarit të përcaktuar nga Ministria e Arsimit, viti akademik 2026-2027 nis më 5 tetor 2026 dhe përfundon më 24 shtator 2027. Universitetet kanë përcaktuar më pas kalendarët përkatës për semestrat, sezonet e provimeve dhe pushimet.
Por përtej atmosferës së zakonshme të një fillimi të ri, universitetet shqiptare hyjnë në një tjetër vit me një shqetësim që dëgjohet gjithnjë e më shpesh edhe nga pedagogët: frekuentimi, niveli i përgatitjes dhe, mbi të gjitha, mungesa e interesit të një pjese të studentëve për procesin e marrjes së dijeve.
Auditoret nuk janë bosh vetëm për shkak të emigrimit apo rënies demografike. Edhe mes atyre që regjistrohen dhe vazhdojnë universitetin, pedagogët ngrenë shqetësimin për një pasivitet që po bëhet gjithnjë e më i dukshëm: më pak pjesëmarrje, më pak përfshirje dhe një raport gjithnjë e më formal me studimet, ku diploma rrezikon të perceptohet si “njё karton mё shumё” dhe tё mos vlerёsohet dija që duhet ta shoqërojë atë.
Sigurisht qё kjo nuk mund t’i faturohet studentit. Një pjesë e të rinjve hyjnë sot në universitet pa qenë të bindur se diploma dhe përpjekja e tyre do t’u garantojnë nesër një vend pune, një pagë dinjitoze apo mundësinë për të ndërtuar jetën në Shqipëri. Kur zbehet perspektiva, bashkë me të zbehet edhe motivimi për të investuar te dija.
Megjithatë, ndërsa çdo tetor numërojmë studentët e regjistruar, degët që plotësohen apo ato që rrezikojnë të mbyllen, shumë më pak flitet për atë që ndodh pasi studentët futen në auditor. Nuk ka ende një analizë publike të posaçme nga Ministria e Arsimit që të masë në mënyrë të plotë frekuentimin, angazhimin, nivelin e përgatitjes dhe shkaqet e kësaj apatie, e më pas të tregojë se çfarë duhet ndryshuar.
Universiteti nuk mund të matet vetëm me sa studentë hyjnë në tetor dhe sa diploma shpërndahen disa vite më vonë. Matja më e vështirë është sa prej tyre dalin me dije, sa dalin të përgatitur dhe, mbi të gjitha, sa prej tyre besojnë ende se ia vlejti të mësonin.
Ky është artikull ekskluziv i KontrasT.al, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to” / Artikulli mund të ripublikohet vetёm i shoqëruar me linkun e artikullit origjinal.
