Pas atentatit të ndodhur dje pranë aeroportit “Nënë Tereza”, ku mbeti i vrarë Gilmando Dani – i njohur si krahu i djathtë i Emiljano Shullazit – dhe u plagos rëndë shoku i tij, Muçi Shaljani (i njohur si Sheqeri), Agjencia e Mbikëqyrjes Policore (AMP) ka zbuluar një skandal brenda strukturave të policisë.
Sipas njoftimit zyrtar, AMP ka ndaluar dy punonjës të Policisë së Shtetit, Nënkomisarin B. C. dhe Inspektorin A. Z., të dy me detyrë në Komisariatin nr. 3 në Tiranë, të cilët dyshohen se kanë falsifikuar “Vërtetimin e Besueshmërisë” që i mundësoi Shaljanit të punësohej si agjent i AMP-së.
Pas ngjarjes së rëndë, ku Shaljani mbeti i plagosur rëndë në kokë, AMP ka nisur verifikime të brendshme për të zbardhur mënyrën sesi ai ishte pranuar në strukturat e agjencisë, pavarësisht të shkuarës problematike dhe mungesës së kushteve të sigurisë.
Dy efektivët e ndaluar, njëri Specialist për Hetimin e Krimeve dhe tjetri Ndihmës/Specialist i Policimit në Komunitet, akuzohen për veprat penale “Falsifikim i vulave, stampave ose formularëve” dhe “Shpërdorim detyre”.
Sipas AMP-së, ata nuk kanë pasqyruar të dhëna që përbënin shkak për cenimin e sigurisë në dokumentin e lëshuar për Shaljanin, duke shkelur detyrimet e përcaktuara në ligjin “Për Policinë e Shtetit”.
Muçi Shaljani, që rezulton të ketë qenë punonjës i AMP-së vetëm prej rreth tre muajsh, ishte pasagjer në makinën që u qëllua me breshëri në afërsi të Rinasit. Ai mori plagë të rënda, ndërsa Gilmando Dani mbeti i vdekur në vend.
Ngjarja ka nxjerrë në pah shkelje flagrante në procesin e rekrutimit të Shaljanit, duke detyruar AMP-në të dërgojë dosjen në Prokurorinë e Tiranës në formën e një kallëzimi penal.
Përveç arrestimit të dy efektivëve, AMP ka paralajmëruar se po verifikon të gjithë zinxhirin komandues të strukturave që kanë pasur rol në procedurat e punësimit të Shaljanit, për të përcaktuar çdo përgjegjësi ligjore apo administrative.
Hetimet pritet të thellohen në ditët në vijim për të zbardhur nëse në këtë proces janë përfshirë edhe zyrtarë të tjerë të Policisë së Shtetit.
