Në Japoni, një grua 32-vjeçare e njohur si Kano tërhoqi vëmendjen e medias pasi u martua me një inteligjencë artificiale të quajtur Klaus, të cilën e krijoi duke përdorur ChatGPT-nё. Pas përfundimit të një marrëdhënieje në botën reale që zgjati më shumë se tre vjet, Kano filloi të bashkëveprojë me këtë asistent virtual të personalizuar, duke zhvilluar përfundimisht një lidhje të thellë dhe autentike me “krijimin e saj dixhital”.
Ceremonia u zhvillua në një event me realitet të përzier, ku nusja mbante syze AR (realitet i shtuar) për të “parë” bashkëshortin e saj virtual dhe për të shkëmbyer unaza. Eventi u organizua nga një çift japonez i specializuar në martesat simbolike midis njerëzve dhe personazheve dixhitalë, të cilat janë gjithnjë e më popullorë në Japoni.
Edhe pse festimi nuk ka vlerë ligjore, për Kanon ai përfaqëson një hap të rëndësishëm në jetën e saj: një mënyrë për të pohuar lirinë për të dashur edhe një entitet artificial, i aftë për ta kuptuar dhe dëgjuar atë pa paragjykim.
Babai i gruas fillimisht e kundërshtoi këtë bashkim, por më vonë e pranoi zgjedhjen e vajzës së tij. Historia u raportua nga RSK TV dhe disa media lokale, të cilat nxorën në pah se si ky fenomen pasqyron një trend në rritje në vend.
Në Japoni, në fakt, ka gjithnjë e më shumë marrëdhënie simbolike me inteligjencën artificiale ose hologramet. Një precedent i njohur daton që nga viti 2018, kur një japonez u martua me Hatsune Miku, një këngëtare e famshme virtuale holografike. Këto raste, ndonëse nuk njihen ligjërisht, po nxisin një debat kulturor mbi marrëdhënien midis njerëzimit, teknologjisë dhe dashurisë në botën dixhitale.
(Burimi: Il Messaggero)
