Pas 20 ditësh prapa hekurave, ish-presidenti francez Nicolas Sarkozy u lirua nga burgu La Santé në Paris, për të vazhduar betejën e tij për pafajësinë në liri. Sarkozy u dënua më 21 tetor të këtij viti me pesë vjet burg për konspiracion kriminal dhe financime të paligjshme të fushatës së tij presidenciale të vitit 2007.
Një panoramë krejt ndryshe po zhvillohet sot në Shqipëri. Ndërsa në Francë ish-kreu i shtetit i dënuar me vendim jo të formës së prerë largohet nga qelitë pas më pak se tre javësh, në Shqipëri ish-presidenti Ilir Meta vijon të qëndrojë në paraburgim, pavarësisht se çështja ndaj tij është ende në fazë hetimore. Dy standarde krejtësisht të ndryshme mes Francës dhe Shqipërisë.
Sipas njoftimit zyrtar, Gjykata e Posaçme e Apelit për Korrupsionin dhe Krimin e Organizuar ka rrëzuar ankimin e Metës dhe ka lënë në fuqi vendimin për masën e sigurisë “arrest me burg”. Trupi gjykues monokratik i kryesuar nga gjyqtarja Saida Dollani, në seancën e datës 14.11.2025, shqyrtoi ankimin e të pandehurit I.M. kundër vendimit Nr. 672, datë 22.10.2025 të Gjykatës së Posaçme të Shkallës së Parë, i cili kërkonte shuarjen e masës së sigurisë.
Në njoftimin e Apelit thuhet: “Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtare Saida Dollani, sot më 14.11.2025 shpalli vendimin mbi çështjen penale nr. 256 akti, datë 04.11.2025 regjistrimi, mbi ankimin e të pandehurit I.M., me objekt: ‘Ankim kundër vendimit Nr. 672, datë 22.10.2025 të Gjykatës së Posaçme të Shkallës së Parë për Korrupsionin dhe Krimin e Organizuar, me objekt: Shuarjen e masës së sigurimit personal të arrestit në burg’. Gjykata vendosi: Miratimin e vendimit nr. 672, datë 22.10.2025 të Gjykatës së Posaçme të Shkallës së Parë për Korrupsionin e Krimin e Organizuar. U shpall në Tiranë, më datë 14.11.2025.”
Me këtë vendim, Ilir Meta mbetet pas hekurave, ndërsa procesi hetimor vijon. Ndërkohë që në Francë një ish-president i dënuar përfundimisht me pesë vjet burg po e përballon procesin në liri, në Shqipëri një ish-president ende pa vendim gjyqësor vazhdon të mbahet në izolim. Një kontrast që ngre pyetje serioze mbi logjikën e dy sistemeve të drejtësisë dhe standardet e tyre.
Në pritje të zhvillimeve të radhës, çështja qëndron e hapur jo vetëm juridikisht, por edhe në debatin publik për mënyrën se si trajtohen figurat e larta politike kur janë të akuzuar.
