Mbrëmë në stadiumin e mbushur të “Tottenham Hotspur” të Londrës (Angli), bijtë e legjendave të boksit anglez Chris Eubank Sr. dhe Nigel Benn, u ndeshën mes tyre për të dytën herë këtë vit, si vazhdim i një dueli 35 vjeçar që filloi me baballarët e tyre.
Conor Benn dominoi Chris Eubank Jr. dhe fitoi bindshëm të 12 raundet, ndryshe nga ndeshja e parë në prill e cila pati shumë diskutime për mënyrën se si fitorja iu dha Chris Eubank Jr. me pikë me vendim të ndarë gjyqtarie, dy me një.
Triumfi i mbrëmshëm i Conor i jep familjes Benn fitoren e tyre të parë ndaj Eubankëve babë e bir, në sfidën e tyre 35-vjeçare në boks. Chris Eubank Sr., babai i Eubank Jr., e mposhti Nigel Benn, babain e Conor, në vitin 1990. Dyshja u ndesh përsëri tre vjet më vonë, në vitin 1993 por doli barazim. Eubanku i ri i shtoi fitoret e familjes prillin e kaluar, duke e mposhtur Benn-in me vendim unanim. Ndeshja e katërt ishte një revansh emocionues për gjithë publikun anglez e jo vetëm për 60,000 spektatorët në kryeqytetin e Britanisë.
Baballarët e boksierëve të rinj, si Eubank Sr. ashtu edhe Nigel Benn ishin të pranishëm në ndeshje përkrah bijve të tyre, duke e kthyer këtë ndeshje në një sfidë publike familjare.
Ben i ri me 24 fitore vetëm 1 humbje, e rrëzoi për tokë Eubank-un e ri dy herë në raundin final. Eubank me 35 fitore vetëm 4 humbje në karrierën e tij, ku ka dalë edhe kampion i peshave të mesme të IBO-së, u ringrit dy herë në minutën e fundit të raundit 12, raund që u dominua nga Conor Benn, ashtu si gjithë ndeshja.
“Si ndihesh baba? Të kam njësh, Nige,” i tha Ben Jr. babait të tij pas fitores në sy të gjithë publikut. Më pas shtoi: “Dua t’ju falënderoj të gjithëve. Ky ishte një udhëtim që përfundoi… ndiej që ky është fundi i sagës Benn-Eubank. Mbaroi – ka mbaruar.”
Pavarësisht sfidës së ashpër mes të dy boksierëve dhe baballarëve të tyre, brenda dhe jashtë ringut, djemtë luftarake anglezë u përqafuan në fund dhe vlerësuan njëri-tjetrin, akt që u pëlqye nga publiku anglez.
