Konkurrentja e parë në Mbretërinë e Bashkuar që fitoi shfaqjen televizive “Kush do të bëhet milioner” ka zbuluar se çfarë bëri me paratë e çmimit të saj 1 milion paund.
Judith Keppel, tashmë 83 vjeç, fitoi çmimin e madh më 20 nëntor 2000, pasi u përgjigj saktë se Eleanor e Akuitanisë ishte e martuar me Mbretin Henry II.
Përpara 25-vjetorit të triumfit që i ndryshoi jetën, Keppel zbulon pёr median se, ajo ende i ka 1 milion paundët që fitoi një çerek shekulli më parë.
“E konsiderova plotësisht se duhej investuar dhe prodhuar të ardhura“, i tha ajo The Times.
Nё fillim ajo shpenzoi ca para për të çuar vajzën e saj, Rosie, me pushime për të parë tigrat në Indi, si dhe bëri dhuratë – një xhip – për një bamirësi ndaj atyre qe kujdeseshin për parqet e egra natyrore.
Keppel punësoi një menaxher financiar për të investuar paratë në aksione, gjë që i solli të ardhura të mira nga dividentët dhe interesat pёrgjatё viteve.
Pasi u nda nga bashkëshorti i saj, Keppel me tre fëmijë nga Fulham i Londrёs Jugperëndimore, pagoi 100 paund pёr tё marrё pjesё nё konkurimin “Kush do të bëhet milioner”.
Kur u pyet si e gjeti pyetjen 1 milion paund se “Cili mbret ishte i martuar me Eleanor Aquitaine?”, ajo u pёrgjigj: “Vetëm dy muaj para programit, kisha qenë në Francë dhe atje pata vizituar një kishë abacie që ishte krejtësisht bosh, qё tё ngjallte frikёn. Atje kishte vetёm katër varre. Nё njërin prej tyre ishte Eleanor dhe pranë saj ishte varri i bashkëshortit tё saj, Henry II”.
Duke folur për çmimin në para, ajo tha: “Bëri një ndryshim të madh për mua.”
Kampionia e kuizit anglez “Kush do të bëhet milioner”, rastësisht bie kushërirë e largët me Mbretëreshën Camilla, dhe akoma deri sot, ёshtё e vetmja femër fituese e kёtij çmimi në Mbretërinë e Bashkuar.
(Burimi: Pёrshtatur nga Daily Mail)
