Kosova, Gjakova këtë fundjavë u mbush me dritë, histori dhe emocion të thellë, duke sjellë një mbrëmje artistike që preku zemrat e publikut. Në një atmosferë të ngrohtë dhe solemne, arti u shndërrua në udhëtim shpirtëror, ku çdo tingull dhe çdo frymë depërtonte në brendësi të njeriut.
Me Orkestrën Simfonike të TKOB nga Shqipëria, artistët u ndjenë të bashkuar “si një trup, një zemër”, siç e përcaktuan bukur autorët e skenarit, Ermal Hasimja dhe Ervin Stafa.
“Suor Angelica” merr fytyrën e nënave shqiptare
Në këtë mbrëmje të veçantë, për herë të parë, “Suor Angelica” mori emër dhe fytyrë shqiptare, atë të Nënë Ferdonijes, të Nënë Pashkës, simbol i dhimbjes, forcës dhe dritës së nënave tona. Atyre që mbajnë brenda shpirtit sakrifica që nuk thuhen, engjëjt tanë të heshtur.
Ky vizion emocional u përjetua thellë nga publiku, duke sjellë lot të heshtur dhe drithërimë.
Një mbrëmje që mbetet në histori
Nën drejtimin e maestros Sergio Alapont dhe falë mbështetjes së drejtorit të TKOB, Aulon Naci, interpretimi i të madhes, Ermonela Jaho arriti kulmin e ndjeshmërisë dhe fuqisë artistike. E shoqëruar nga Orkestra Simfonike e TKOBAP, sopranoja jonë madhështore krijoi një mbrëmje që do të kujtohet gjatë në historinë kulturore të qytetit. Kjo ngjarje nuk ishte vetëm performancë, ishte një udhëtim në zemrën e shqiptarit.
Ky projekt u realizua me skenar të Ermal Hasimes dhe aktorë: Arbies Komoni, Vlora Dervishi, Besfort Berberi, solokëngëtaret e reja nga Gjakova: Elita Hoxha, Bademe Krasniqi, Suna Lota, koret e shkollës së muzikës “Prenk Jakova”, Gjakovë, dirigjentë: Klodina Kryeziu Hana, Kastriot Sada, lahutë: Januz Mushkolaj dhe flaut: Jeta Gërqari.
Artistët shprehen se mezi presin projektet e radhës, duke premtuar sërish art që prek zemrën.
