Opozita shqiptare pritet të zbresë sot në shesh, duke nisur në orën 18:00 protestën e paralajmëruar prej ditësh përballë Kryeministrisë. Partia Demokratike, e mbështetur edhe nga forca të tjera të spektrit opozitar dhe përfaqësues të shoqërisë civile, ka bërë thirrje për një tubim masiv kundër, siç e cilëson ajo, qeverisë së kapur nga korrupsioni dhe aferat klienteliste.
Protesta vjen në një moment tensioni të lartë politik, ku në qendër të akuzave është hetimi i aferës së Tunelit të Llogarasë, ndër projektet më të mëdha infrastrukturore të viteve të fundit. Nën moton “Protesto – Për familjen, për ekonominë, për demokracinë”, PD fton qytetarët të ngrihen kundër asaj që e quan “narko-qeveri që mban peng Shqipërinë”.
Në komunikimin e fundit publik, kreu i PD-së, Sali Berisha, deklaroi se protesta është një formë e re beteje politike përballë një parlamenti që, sipas tij, funksionon si mekanizëm formal pa hapësirë për debat real:
“Nesër Partia Demokratike ndërmerr hapin më të rëndësishëm kundër narkoparlamentit të kontrolluar nga Ramaduro. Fillimi i platformës parlamentare përpara kryeministrisë! Kjo është alternativa e vetme, pasi parlamenti kalon qeverinë, programin dhe buxhetin pa debat,” shkroi Berisha.
Sot shihet si një ditë testi jo vetëm për PD-në, por edhe për qeverinë dhe opinionin publik. Dinamika e protestës mund të prodhojë dy skenarë të ndryshëm.
Një protestë masive do të konsiderohej sinjal se pakënaqësia sociale ndaj qeverisë është thelluar dhe se opozita ende ka potencial të mobilizojë popullin. Politikisht, kjo do të forconte pozicionin e PD-së duke i dhënë legjitimitet rrugës së protestës, ndërsa për Kryeministrin Rama do të ishte një paralajmërim serioz se tensionet politike dhe ekonomike nuk mund të injorohen më.
Nëse sheshi mbetet i vakët, kjo do të shihej si një goditje e rradhës e fortë për opozitën, duke ushqyer narrativën se ajo është e fragmentuar dhe pa mbështetje reale. Një rezultat i tillë do të përdorej politikisht nga mazhoranca si provë se shqiptarët nuk identifikohen me thirrjet e PD-së dhe se qeveria vazhdon të gëzojë stabilitet publik.
Në këtë sfidë të re të opozitës, mbetet për t’u parë nëse Partia Demokratike sot do të tregojë se e ka seriozisht betejën për ndryshim, apo protesta do të shndërrohet në një shfaqje të radhës politike, një përpjekje për të dëshmuar se ende është aty – mes krizës së besueshmërisë dhe mungesës së alternativës së qartë.
Sytë e vendit janë tek ora 18:00.
Sheshi do të tregojë më shumë sesa fjalët.
