Një foshnjë 18-muajshe nga Birmingham ka rrezikuar jetën pasi gëlltiti aksidentalisht lëngun zhbllokues të tubave, duke e ngatërruar me qumështin. Nëna e tij po pastronte banjën kur vogëlushi Sam Anwar Alshameri mori shishen që ajo kishte lënë në dysheme dhe piu nga ajo, pa u vënë re.
Foshnja pësoi djegie të rënda në rrugët e frymëmarrjes, buzë, gojë dhe gjuhë, dhe megjithëse u dërgua me urgjencë në spital, gjendja e tij u përkeqësua. Sam kaloi dy muaj në kujdes intensiv dhe aktualisht nuk është në gjendje të hajë, të pijë ose të flasë, ndërsa buzët i janë mbyllur pothuajse krejtësisht për shkak të dëmtimeve. Mjekët u detyruan t’i hiqnin tubin e ushqyerjes nga hunda dhe t’i vendosnin një tub të përhershëm direkt në stomak.
Babai i tij, Nadeen Alshameri, 37 vjeç, rrëfen se gruaja e tij Mukhtara, 27 vjeç, po pastronte banjën, ndërsa katër fëmijët e çiftit – të moshave 7, 3, 1 dhe 8 muajsh – ishin në dhomën e ndenjes. “Pa e ditur ajo, Semi hyri pas saj dhe mori shishen që ajo kishte lënë në dysheme. Ai mendoi se ishte qumësht. Kur e kuptuam, ishte vonë, acidi po e digjte”, tregon ai.
Sam pësoi djegie të brendshme serioze dhe sapo mbërriti në Spitalin e Grave dhe Fëmijëve në Birmingham, zemra i ndaloi për gati tre minuta, para se mjekët të arrinin ta ringjallnin. “Nuk mund ta harroj kurrë atë moment. Mjeku tha se ishte një shans një në një milion që ai mbijetoi”, u shpreh i ati.
Babai thotë se djali është në listën e pritjes për një ndërhyrje rindërtuese urgjente, por ende pa një datë të caktuar. Ai shprehet i dëshpëruar me pritjen e gjatë dhe mungesën e qartësisë nga mjekët: “Goja e tij po mbyllet e tëra dhe ka mbetur vetëm një hapësirë shumë e vogël. Çdo mjek më thotë diçka tjetër. NHS më tha se jemi në duar të sigurta, por asgjë nuk po ndodh.”
I ati dëshiron ta dërgojë Sam-in te specialistë në Gjermani ose Turqi, ku beson se mund të kryhet operacioni i nevojshëm. Për këtë arsye ai ka hapur një faqe GoFundMe për mbledhjen e fondeve. “Me qira, ushqim, gjithçka… po mbijetojmë. S’mund të kursejmë për një operacion jashtë vendit. Kam nevojë për ndihmë. Dua vetëm që fëmija im të jetë mirë”, thotë ai.
(Burimi: Daily Mail)
