Qeveria britanike ka akuzuar Rusinë për një incident serioz sigurie, pasi një anije spiunazhi ruse ka hyrë në ujërat britanike pranë Skocisë dhe ka drejtuar lazer ndaj pilotëve të forcave ajrore. Ministri i Mbrojtjes, John Healey, tha se anija “Yantar” ndodhet në kufijtë detarë të Mbretërisë së Bashkuar dhe është e pajisur për mbledhjen e të dhënave të inteligjencës dhe për marrjen e hartёs sё kabllove nënujore të komunikimit dhe energjisë të Mbretërisë së Bashkuar dhe aleatëve të saj të NATO-s.
Sipas Healey, një avion ushtarak i tipit “RAF Poseidon-8” është dislokuar për të monitoruar anijen dhe ekuipazhi i tij raportoi se nga bordi i “Yantar” kanё drejtuar lazera nё drejtim tё avionit. Ai paralajmëroi se Britania është e përgatitur të reagojë nëse anija lëviz drejt jugut ose ndërmerr veprime të tjera provokuese.
Rusia ka mohuar akuzat, duke deklaruar përmes ambasadës së saj në Londër se “Yantar” është një anije kërkimore që operon në ujëra ndërkombëtare dhe se britanikët po nxisin tensione dhe histeri ushtarake. Moska e cilësoi reagimin britanik si provokim politik.
Raportohet se “Yantar” është futur në zonën ekskluzive ekonomike të Mbretërisë së Bashkuar – e cila shtrihet deri në 200 milje detare – por nuk ka tejkaluar kufirin e 12 miljeve të ujërave territoriale.
Londra e sheh këtë incident si pjesë të një serie provokimesh ruse ndaj NATO-s, ndërsa lufta në Ukrainë vijon dhe tensionet në Evropë mbeten të larta. Kohët e fundit, dronë rusë kanë hyrë disa herë në hapësirën ajrore të vendeve aleate, ndërsa Polonia akuzoi Moskën për një sabotazh në hekurudhën kryesore drejt Ukrainës.
Ministri britanik i Mbrojtjes theksoi se vendi po përballet me “një epokë të re kërcënimesh” dhe se qeveria do të mbetet vigjilente përballë veprimeve të tilla.
(Burimi: CNN)
