Kristiano Ronaldo ishte një ndër të ftuarit specialë të Presidentit Donald Trump, në darkën qё ky shtroi në Shtëpinë e Bardhë, për nder të vizitës në SHBA të Princit të Kurorës së Arabisë Saudite, Mohammed bin Salman.
Ronaldo ishte ulur në krye të Sallës Lindore, pranë zonës ku presidenti amerikan dhe princi saudit mbajtën fjalimet përpara zyrtarëve të të dy vendeve, si dhe drejtuesve të biznesit botëror, ndër të cilët drejtori ekzekutiv i Apple – Tim Cook dhe themeluesi i Tesla-s, Elon Musk.
Ylli portugez nuk humbi rastin të realizonte edhe një selfie brenda Shtëpisë së Bardhë.
Gjatë fjalës së tij, Trump e përmendi posaçërisht Ronaldon, duke thënë se e kishte prezantuar atë para djalit të tij adoleshent, Barron. Presidenti falënderoi futbollistin për pjesëmarrjen, duke theksuar se djali i tij është një fans i madh i sulmuesit legjendar dhe ishte jashtëzakonisht i lumtur qё mundi ta takojё.
“Besoj se më respekton pak më shumë tani, thjesht për faktin që e prezantova me ty,” tha Trump me humor.
Së fundmi, Ronaldo ka deklaruar se Trump është “një nga njerëzit që mund të ndihmojë në ndryshimin e botës”. Gjatё një interviste me gazetarin Piers Morgan, ai ёshtё shprehur se: “Trump është një nga njerëzit që dua të takoj. Mendoj se ai mund t’i bëjë gjërat realitet, dhe më pëlqejnë njerëz të tillë”.
Megjithatë, Ronaldo nuk ngurroi të theksonte disi me humor se famën e vet e vlerëson më të madhe se atë të presidentit amerikan: “Njerëzit më njohin më shumë se atë. Në botë, askush nuk është më i famshëm se unë.”
